Улсын бүртгэлийн байгууллагын 85 жилийн ой тохиож буй юм. Ойн хүрээнд бид 21 аймаг, 9 дүүргийн бүртгэлийн хэлтэс болон Улсын бүртгэлийн ерөнхий газрын даргын ярилцлагыг цувралаар уншигчдад хүргэхээр бэлдлээ.
Цуврал №1: Сумын бүртгэгчээс Архангай аймгийн улсын бүртгэлийн хэлтсийн дарга хүртэл – 2009 оноос эхлэн бүртгэлийн байгууллагад зүтгэж буй Б.Нарантуяаг онцолж байна.
– Танай аймгийн бүртгэлийн хэлтэс хэдэн онд байгуулагдсан бэ? Анхны үеийн онцлогийг дурдана уу.
1940 онд Улсын цагдан сэргийлэх газрын бүрэлдэхүүнд паспортын хэлтэс байгуулагдаж, Архангай аймагт гурван хүний бүрэлдэхүүнтэйгээр паспорт, гэр бүлийн бүртгэл хариуцан ажиллаж эхэлсэн. 1954 оноос тусгай хэлтэс байгуулагдаж, иргэний гэр бүлийн байдал, хүн амын хөдөлгөөн, байгууллагын ажлын удирдлага, хууль тогтоомжийн хэрэгжилтэд хяналт тавьж байв. Харин үл хөдлөх хөрөнгийн эрхийн бүртгэлийн товчоо 1997 онд байгуулагдаж, анхны бүртгэлээ 1998 онд хийсэн байдаг. 2003 онд газар өмчлөх эрхийн улсын бүртгэлийг эхлүүлсэн.
– Та ажиллаж байх хугацаандаа хамгийн тод харсан өөрчлөлт юу байв?
2008 оноос иргэдийн мэдээллийг хянан баталгаажуулж, 2009 оноос шинэчилсэн бүртгэл явуулснаар бүртгэлийн ажил цахимжиж эхэлсэн. Энэ нь иргэдэд илүү шуурхай, хүртээмжтэй үйлчилгээ авах боломж олгосон.
– Сүүлийн жилүүдэд танай байгууллагаас хэрэгжүүлсэн онцлох ажил юу вэ?
Алслагдсан сумдад очиж бүртгэлийн иж бүрэн үйлчилгээ үзүүлэх ажлыг зохион байгуулсан. Ингэснээр сумдад улсын бүртгэгчийн алба байгаагүй нөхцөлд иргэдийн хэрэгцээг хангаж, тэдний сэтгэл ханамжийг нэмэгдүүлсэн.
– Цахим үйлчилгээний ач холбогдлыг хэрхэн харж байна вэ?
2023 оноос эхлэн 5914 иргэний зөрчлийг цахимаар арилгаж, 6000 гаруй иргэн өөрийн биеэр ирэлгүйгээр E-Mongolia системээс лавлагаа мэдээллээ авах боломжтой болсон. Цахимжуулалт нь иргэн, төрийн харилцааг илүү ойр болгож байна.
– Танай байгууллагын онцлог, тулгардаг сорилт юу байдаг вэ?
Бид баяр, гуниг, яарсан сандарсан янз бүрийн сэтгэл зүйтэй иргэдтэй өдөр бүр ажилладаг. Тэр бүхэнд төрийн үйлчилгээг тэгш, шуурхай хүргэх нь онцлог. Мөн хөгжлийн бэрхшээлтэй иргэдэд зориулан стандартын дагуу зам, чиглүүлэгчийг хийсэн.
– Иргэдийн оролцоо, хүлээлтийг та ямар түвшинд гэж хардаг вэ?
Иргэдийн оролцоо өндөр. Тэд цаг хэмнэх, цахим үйлчилгээ, гарын үсгийг түлхүү хүсдэг болсон. Хүлээлт нь ил тод, шуурхай үйлчилгээнд төвлөрч байна.
– Цаашдын хөгжлийн чиг хандлага?
Иргэдэд хэрэгцээтэй төрийн үйлчилгээг бүрэн цахимжуулах, төрийн үйлчилгээг илүү ойр, хүртээмжтэй болгоход анхаарч ажиллана. Архангай аймгийн бүртгэлийн хэлтсийг иргэдэд нэн ойр, тэргүүлэх байгууллага болгон хөгжүүлэх зорилготой.
– Энэ жил Улсын бүртгэлийн байгууллагын 85 жилийн ой тохиож буй, та мэндчилгээ дэвшүүлнэ үү.
Монгол Улсад бүртгэлийн байгууллага үүсч хөгжсөний 85 жилийн ой, нэгдсэн тогтолцоонд шилжсэний 16 жилийн ойг тохиолдуулан үе үеийн ахмадууд болон одоо ажиллаж буй хамт олондоо баярын мэнд дэвшүүлье. Мөн хамт олон маань байгууллагынхаа төлөө чин сэтгэлээсээ ажиллаж байгааг хараад урам авдаг. Та бүхэндээ чин сэтгэлээсээ талархал илэрхийлье.
