Төрийн жинхэнэ албаны мэргэшлийн шалгалт өгч тэнцэн, төрийн захиргааны алба эрхлэх болзол, шаардлага хангасан Улсын бүртгэлийн байгууллагын 13 албан хаагч өнөөдөр /2025.07.03/ төрийн сүлдэндээ мэхийн ёсолж, төрийн жинхэнэ албан хаагчийн тангаргаа өргөн, баталгаажууллаа.
Тангараг өргөх ёслолын ажиллагааны үеэр төрийн жинхэнэ албан хаагчдад хандаж УБЕГ-ын даргын албан үүргийг түр орлон гүйцэтгэгч Д.Давааням “Монгол улсад төрийн албаны асуудлыг эрхлэн шийдвэрлэдэг, төрийн албаны төв байгууллагын түүхт 30-н жилийн ой өнөөдөр тохиож байна. Мөн 2024 оноос эхлэн Төрийн албаны өдөр болгон тэмдэглэж эхэлсэн энэ өдөр та бүхэн төрийн жинхэнэ албан хаагчийн тангараг өргөж байгаад туйлын баяртай байгааг дурдаж төрийн жинхэнэ албан хаагчийн тангараг өргөснөөр төрийн албан хаагчийн эрх зүйн байдал баталгаажиж, төрийн албаны чиг үүргээ хуулийн дагуу нэр төртэйгөөр гүйцэтгэх ёстойг захилаа. Албан хаагчдад Монгол улсын хууль тогтоомжийг дээдлэн сахиж, шударга ёсыг нийгэмд төлөвшүүлж, ёс зүйн болон ажил мэргэжлийн манлайллыг үзүүлж, нийгэмд үлгэр жишээ төрийн албан хаагч байхыг сануулан амжилт хүсье” гэв.
Төрийн албаны ажил, амьдралын замналдаа сэтгэл шулуудан гарч байгаа нийт тангараг өргөсөн албан хаагчдадаа чин сэтгэлийн халуун баяр хүргэж, ажил амьдралд нь хамгийн сайн сайхан бүхнийг хүсье.
