Баянхонгор аймгийн улсын бүртгэлийн хэлтэс нь 2024 оноос эхлэн аймгийн Төрийн цахим үйлчилгээний хэлтэс, Насан туршийн суралцахуйн төвтэй хамтран иргэдийн цахим үйлчилгээ авах ур чадварыг дээшлүүлэх нөлөөллийн ажлыг амжилттай зохион байгуулжээ. Тодруулбал, "Тоон гарын үсгийн хэрэглээ, тоон гарын үсгийн түлхүүр, түүний хадгалалт, хамгаалалт", Төрийн цахим үйлчилгээний хэлтсээс "Цахим орчинд хувийн мэдээллээ хамгаалах, кибeр аюулгүй байдлаас урьдчилан сэргийлэх" талаар мэдээллийг хүргэсэн байна.
Нөлөөллийн ажлын хүрээнд:
- Ахлах ангийн 150 орчим сурагчийг “Цахим ур чадварын сургагч багш”-аар бэлтгэж, тэдгээр сурагчид ахмадуудыг сургах эхний ээлжийн баг болгон ажиллаж байна.
- 2025 оны 5 дугаар сарын 15-ны өдөр Баянхонгор суманд аймгийн Ахмадын холбоо, орон нутгийн ахмадын хороотой хамтарч 30 гаруй ахмад насыг хамруулсан сургалт амжилттай явагдлаа.
Сургалтын үеэр дараах үйл ажиллагаанууд зохион байгуулагдав:
- Улсын бүртгэлийн байгууллагаас тоон гарын үсэг (G-sign) олголтын үйлчилгээ үзүүлэх, хэрэглээ, түлхүүрийн хадгалалт, хамгаалалтын талаар мэдээлэл хүргэлээ.
- Төрийн цахим үйлчилгээний хэлтсээс цахим орчинд хувийн мэдээллээ хамгаалах, кибер аюулаас урьдчилан сэргийлэх зөвлөмж, практик дасгалуудыг зааж сургажээ.
- Насан туршийн суралцахуйн төвийн н.Нансал багш “Цахим элч сургагч багш” хүүхдүүдтэйгээ хамтран ахмадуудын гар утсан дээр G-sign болон e-Mongolia аппликейшнуудыг суулгах, цахим үйлчилгээг хэрхэн авах аргачлалыг зааж, анхан шатны мэдлэг, чадварыг эзэмшүүлсэн үр дүнтэй сургалт боллоо.
Энэхүү нөлөөллийн ажлыг сумдад зохион байгуулж, цахим үйлчилгээний хүртээмжийг нэмэгдүүлэхээр төлөвлөж байгаа ажээ.
