2025 оны 5 дугаар сарын 14-ний өдөр Улсын бүртгэлийн ерөнхий газар БНСУ-ын Олон улсын хамтын ажиллагааны байгууллага (КОЙКА)-тай хамтран хэрэгжүүлсэн “Улсын бүртгэлийн системийн үйл ажиллагааг дэмжих төсөл”-ийн хэрэгжилтийн дараах шалгалтын хүрээнд уулзалт зохион байгууллаа.
Төсөл нь 2020–2022 онд КОЙКА-ийн буцалтгүй тусламжаар амжилттай хэрэгжсэн бөгөөд Улсын бүртгэлийн байгууллагын дэд бүтцийг бэхжүүлэх, техник тоног төхөөрөмжөөр хангах, хүний нөөцийн чадавхыг дээшлүүлэхэд чиглэсэн юм.
Төсөл хэрэгжсэнээр Улсын бүртгэлийн ерөнхий газар орчин үеийн шаардлагад нийцсэн “Дата төв”-ийг байгуулж, техник, тоног төхөөрөмжөөр хангагдсан бол, чадавхижуулах мэргэжлийн сургалтуудыг үе шаттайгаар зохион байгуулсан нь албан хаагчдын мэдлэг, чадвар, хандлагын өөрчлөлтөд үнэтэй хувь нэмэр оруулж байна.
Уулзалтын үеэр төслийн үр дүн, серверийн өрөөний ашиглалт, техник тоног төхөөрөмжийн хэрэглээ, сургалтад хамрагдсан албан хаагчдын сэтгэгдэл, үйлчилгээний чанар болон иргэдийн сэтгэл ханамжийн талаар харилцан мэдээлэл солилцлоо. Мөн төсөл хэрэгжсэнээр үйлчилгээний төрөл нэмэгдэж, иргэдийн цаг хугацааг хэмнэхэд чухал нөлөө үзүүлж байгааг тэмдэглэлээ.
Төгсгөлд нь уулзалтад оролцогчид Дата төвийн үйл ажиллагаатай биечлэн танилцаж, цаашдын хамтын ажиллагааны чиглэлээр хүсэл сонирхлоо илэрхийлж, санал солилцсон юм.
