Улсын бүртгэлийн байгууллагын түүхт 85 жилийн ойн хүрээнд Улсын бүртгэлийн ерөнхий газрын албан хаагчид байгаль орчныг хамгаалах, ногоон хөгжлийг дэмжих, зорилгоор Монгол Улсын ерөнхийлөгчийн санаачилсан “Тэрбум мод” үндэсний хөтөлбөрт нэгдэн Үндэсний цэцэрлэгт хүрээлэнд мод тарилаа.
Үйл ажиллагаанд Улсын бүртгэлийн ерөнхий газрын удирдлагууд болон нийт албан хаагчид идэвхтэй оролцож, нийгмийн хариуцлагын хүрээнд байгаль орчны нөхөн сэргээлт, ногоон байгууламжийг нэмэгдүүлэхэд хувь нэмрээ орууллаа. Арга хэмжээний үеэр нийт 50 ширхэг мод тарьсан бөгөөд үргэлжлүүлэн тарьсан моддын арчилгаа, хамгаалалтад анхаарч, тогтмол хяналт тавьж ажиллахаар төлөвлөсөн байна.
Энэхүү санаачилга нь зөвхөн ой тэмдэглэх хүрээнд бус, тогтвортой хөгжил, ирээдүй хойч үедээ эрүүл, ногоон орчныг өвлүүлэх үйлсэд үнэтэй хувь нэмэр оруулж буй үйлдэл юм. Цаашид Улсын бүртгэлийн байгууллага нийгмийн сайн сайхны төлөө, эерэг үйл ажиллагааг улам өргөжүүлэн зохион байгуулж, байгальд ээлтэй жишиг байгууллага болохыг зорьж байна.
