2025 оны 5 дугаар сарын 8-ны өдөр Монголын хүмүүнлэгийн өдрийг тохиолдуулан Хан-Уул дүүргийн Улаан загалмайн хорооноос “Хүмүүнлэгийн үйлсийг манлайлагч-2025” шагнал гардуулах ёслолын ажиллагааг ёслол төгөлдөр зохион байгууллаа.
Энэхүү арга хэмжээг Смарт сургуулийн 9-1 ангийн сурагчид хүмүүнлэгийн үйлсэд шинээр нэгдэн тангараг өргөх ёслолоор нээж, уриа дуудлагаа цуурайтуулсан нь арга хэмжээнд урам зориг, утга учрыг нэмсэн чухал мөч байлаа.
Ёслолын ажиллагаанд Хан-Уул дүүргийн ИТХ-ын дарга бөгөөд ХУД-ийн Улаан загалмайн хорооны Удирдах зөвлөлийн дэд тэргүүн Ч.Бат-Оргил, мөн Хан-Уул дүүргийн Улсын бүртгэлийн хэлтсийн дарга С.Оюун-Эрдэнэ нар оролцож, хүмүүнлэгийн үйлсийг манлайлагчдад чин сэтгэлийн талархал хүргэлээ.
Мөн Хан-Уул дүүргийн Улсын бүртгэлийн хэлтэс “Хүмүүнлэг Байгууллага” хэмээх нэр хүндтэй шагналыг хүртсэн нь хамт олны нийгмийн хариуцлага, сайхан сэтгэлийн илэрхийлэл боллоо.
Арга хэмжээ нь хүмүүнлэгийн үнэт зүйлсийг түгээх, олон нийтийн оролцоог нэмэгдүүлэх, энэрэнгүй нийгмийг цогцлоох чухал алхам болсныг зохион байгуулагчид онцоллоо.
