Монголын хуульчдын холбооноос санаачлан Улсын бүртгэлийн байгууллага, УИХ-ын тамгын газрын дэргэдэх Парламентын судалгаа, хөгжлийн хүрээлэн, Захиргааны эрх зүйн хороотой хамтран “Хуулийн этгээдийн бүртгэлийн эрх зүйн зохицуулалт, тулгамдаж буй асуудал” сэдэвт хэлэлцүүлгийг өнөөдөр буюу 2025 оны 04 дүгээр сарын 24-ний өдөр зохион байгууллаа.
Хэлэлцүүлгийг Монголын Хуульчдын холбооны Ерөнхийлөгч П.Одгэрэл, Улсын бүртгэлийн ерөнхий газрын Тамгын газрын дарга Д.Давааням нар нээж үг хэллээ.
Энэхүү хэлэлцүүлэгт Улсын бүртгэлийн байгууллагын Хуулийн этгээдийн улсын бүртгэлийн 30 албан хаагчид мөн шүүх, прокурор, цагдаа, хуульч нар оролцсон юм. Хуулийн этгээдийн улсын бүртгэлийн эрх зүйн зохицуулалт, тулгамдаж буй асуудал, улсын бүртгэлийн гэрчилгээ болон тамга, тэмдгийн хяналтын дугаар дахин олгох, тамга тэмдэг алдагдсан, эрх бүхий этгээд тамга, тэмдгийг хүлээлгэн өгөхгүй байгаа үйлдэл, эс үйлдэхүй сэдвийн хүрээнд хэлэлцүүлэг өрнөлөө.
Хуулийн этгээдийн улсын бүртгэлийн газрын дарга Ж.Аюуш: Хуулийн этгээдийн гэрчилгээг цахим болгоно.
"Бидний гол барьж байгаа зарчим хуулийн этгээдийн бүртгэлийн цахим үйлчилгээний чанар хүртээмжийг сайжруулах, хуулийн этгээдийн гэрчилгээ, тамга, тэмдгийг цахим хэлбэрт шилжүүлэхэд чиглэж байна. Улсын бүртгэлийн байгууллага 2023 оноос эхлэн Хуулийн этгээдийн улсын бүртгэлийн тухай хуульд нэмэлт өөрчлөлт оруулахаар 2024 онд УИХ-д өргөн барьж байсан ба энэ ажлын хүрээнд 2025 онд ажлын хэсэг шинээр байгуулагдан ажиллаж байна. Одоо хэрэгжиж буй хууль тогтоомжид цаасан нотлох баримт эх нотлох баримт байхаар хуульчилсан байдаг тул цахим шилжилтэд бүрэн шилжихэд хууль тогтоомжийн өөрчлөлт болон системийн шинэчлэлтийн асуудлыг шийдэхэд хугацаа шаардагдаж байна. Мөн И-Бизнес платформ буюу цахим үйлчилгээг сайжруулахаар ЦХИХХЯ-тай хамтран ажиллаж байгаа бөгөөд энэ ажлын хүрээнд хуулийн этгээдийн нэрийг AI ашиглан шүүх, гэрчилгээг блокчэйн технологи ашиглан цахимаар олгох зэрэг ажлуудыг хийхээр эхлүүлээд байна" гэв.
