Хууль зүй, дотоод хэргийн сайд О.Алтангэрэлийн тушаалаар Улсын бүртгэлийн ерөнхий газрын Иргэний улсын бүртгэлийн газрын дарга Т.Төгөлдөр, Хуулийн этгээдийн улсын бүртгэлийн газрын дарга Ж.Аюуш нарыг шагналаа.
Иргэний улсын бүртгэлийн газрын дарга Т.Төгөлдөр: Миний хувьд МУИС-ийн Хууль зүйн сургуулийг эрх зүйч мэргэжлээр төгссөн. 2006 онд хуульчийн сонгон шалгаруулалт, мөн 2008 онд өмгөөлөгчийн мэргэшлийн сонгон шалгаруулалт тэнцэж, өөрийн мэргэжлээр ажиллаж эхэлж байлаа. Өдгөө 19 дэх жилдээ хууль зүйн салбарт ажиллаж байна. Улсын бүртгэлийн байгууллагад 2020-оноос эхлэн хуулийн этгээдийн улсын бүртгэлийн газрын дарга, 2023 оноос иргэний улсын бүртгэлийн газрын даргаар ажиллаж байна. Өнөөдөр энэхүү шагналаар шагнуулж байгаа нь нэр хүндийн хэрэг байна. Удирдлага, хамт олон болон иргэний улсын бүртгэлийн салбарын нийт албан хаагч нартаа талархаж байна.
Хуулийн этгээдийн улсын бүртгэлийн газрын дарга Ж.Аюуш: Миний хувьд 20 гаруй жил хууль зүйн салбарт ажиллаж байна. Бүртгэлийн байгууллагад 15 дахь жилдээ зүтгэж байна. Модон могой жилийн босгон дээр салбарынхаа нэр хүндтэй шагналаар шагнуулсандаа туйлын баяртай байна. Энэхүү шагнал бол ганц миний хөдөлмөр биш, газрын болон 9 дүүрэг, 21 аймагт ажиллаж байгаа миний хамт олны хөдөлмөр юм. Итгэлийг нь дааж илүү их хичээж ажиллах болно.
