Дипломат төлөөлөгчийн газрын бүртгэлийн ажилтнууд цахим сургалтад хамрагдлаа

A- A A+
Дипломат төлөөлөгчийн газрын бүртгэлийн ажилтнууд  цахим сургалтад хамрагдлаа

Улсын бүртгэлийн ерөнхий газрын Иргэний улсын бүртгэлийн газраас Хилийн чанадад ажиллаж байгаа Дипломат төлөөлөгчийн газрын иргэний улсын бүртгэл хариуцсан бүртгэлийн ажилтнуудад зориулсан сургалтыг 2021 оны 3 дугаар сарын 19-ний өдөр цахимаар  зохион байгууллаа. Өмнөх жилүүдэд ийм төрлийн сургалтыг Гадаад Харилцааны яамнаас зохион байгуулж байсан бол энэ удаад УБЕГ-ын Иргэний улсын бүртгэлийн газраас зохион байгуулж байгаагаараа онцлогтой юм. 

Сургалтыг Иргэний улсын бүртгэлийн газрын дарга Т.Нармандах нээж, иргэний улсын бүртгэлийн өнөөгийн байдал, цаашдын чиг хандлага болон иргэний улсын бүртгэлийн газраас 2021 онд хийж хэрэгжүүлэх үйл ажиллагааны талаарх тодорхой мэдээллийг өглөө.

Цахим сургалтад Иргэний улсын бүртгэлийн газрын ахлах мэргэжилтэн Н.Наранцэцэг, улсын ахлах бүртгэгч Б.Отгон, Н.Нарангэрэл, улсын бүртгэгч Ч.Батцэцэг, Д.Оюундэлгэр, Ц.Баярмаа, Мэдээллийн технологийн газрын ахлах мэргэжилтэн С.Дэлгэрмөрөн, Санхүү аж ахуйн хэлтсийн нярав Ц.Ганчимэг нар оролцож Иргэний улсын бүртгэлийн тухай  хууль тогтоомжийг нэг мөр ойлгон  хэрэгжүүлэх, бүртгэл хөтлөхөд анхаарах асуудал, Монгол Улсын Ерөнхийлөгчийн сонгуулиар улсын бүртгэлийн байгууллагын хэрэгжүүлэх чиг үүргийн хүрээнд гадаад улсад байгаа сонгогчдын нэрийн жагсаалтыг үйлдэх, танилцуулахад анхаарах асуудал, иргэний улсын бүртгэлийн программ хангамжийн хөгжүүлэлт болон  иргэний улсын бүртгэлийн үйл ажиллагаанд хэрэглэгдэж байгаа маягт, гэрчилгээний үнэт цаасны зарцуулалт, төлбөр тооцооны тайлан хэрхэн гаргах зэрэг асуудлаар тус тус дэлгэрэнгүй мэдээлэл хүргэн, харилцан санал солилцсон үр дүнтэй сургалт байлаа хэмээн оролцогчид дүгнэсэн юм. 

Уг сургалтад Монгол Улсаас хилийн чанадад суугаа 46 Дипломат төлөөлөгчийн газрын бүртгэлийн ажилтнууд хамрагдсан бөгөөд сургалтын төгсгөлд оролцогчдын асуусан асуултад дэлгэрэнгүй хариулт өгч, иргэний улсын бүртгэлийн газраас хэд хэдэн холбогдох асуудлаар зөвлөмж, чиглэл хүргүүлж ажиллахаар болов.  

 

УБЕГ-ын Хамтын ажиллагаа, сургалтын хэлтэс