Хөгжлийн бэрхшээлтэй хүний эрхийн тухай хуулийн хэрэгжилтийг эрчимжүүлэх, хөгжлийн бэрхшээлтэй иргэдийн нийгмийн оролцоо, хөгжлийг дэмжих, мэдээллийн хүртээмжийг сайжруулах чиглэлээр идэвх санаачлага гарган, тухайн салбартаа манлайлан ажилласан иргэд, байгууллагыг тодруулах зорилготой “Хөгжлийн бэрхшээлтэй хүнд хүртээмжтэй оны шилдэг”-ийг шалгаруулж, өргөмжлөл гардуулах ёслолын үйл ажиллагаа өнөөдөр /2021.02.10/ Хөдөлмөр, нийгмийн хамгааллын яаманд боллоо.
Хоёр дахь удаагаа зохион байгуулагдаж буй “Хөгжлийн бэрхшээлтэй хүнд хүртээмжтэй оны шилдэг”-ийг шалгаруулах уг үйл ажиллагаа нийт 9 номинациар шилдгүүдээ тодруулдаг бөгөөд энэ онд Улсын бүртгэлийн ерөнхий газар “Хөгжлийн бэрхшээлтэй хүнд хүртээмжтэй оны шилдэг төрийн төсөвт болон орон нутгийн өмчит байгууллага”- аар шалгарч цом, өргөмжлөлөө гардан авлаа.
Засгийн газрын хэрэгжүүлэгч агентлаг Улсын бүртгэлийн ерөнхий газраас хөгжлийн бэрхшээлтэй хүний эрхийн тухай хуулийн хэрэгжилтийг хангах, хөгжлийн бэрхшээлтэй хүний эрх, оролцоо, хөгжлийг дэмжих, хамгааллыг сайжруулах зорилтыг хэрэгжүүлэх ажлын хүрээнд Улсын бүртгэлийн байгууллагын /УБЕГ, 21 аймаг, нийслэл/ цахим хуудсыг шинэчилж, төрийн байгууллагын цахим хуудсанд тавигдах ерөнхий болон тусгай шаардлагуудыг хэрэгжүүлэн ажиллаж байна.
Ингэснээр Улсын бүртгэлийн ерөнхий газар болон орон нутаг дахь газар, хэлтсийн цахим хуудсуудыг нэг стандарт болгож, www.burtgel.gov.mn албан ёсны цахим хуудсаар дамжуулан хараа, сонсгол болон хөдөлгөөний бэрхшээлтэй хэрэглэгчдэд зориулсан аудио, дохионы хэлмэрчтэй видео болон текст мэдээ мэдээллийн үсгийн фонтыг томруулж унших боломжийг бүрдүүлсэн платформийг хөгжүүлж байна. Уг платформыг хөгжүүлснээр Цахим Монгол үндэсний хөтөлбөрийг хэрэгжүүлж, Улсын бүртгэлийн үйл ажиллагаанд орчин үеийн дэвшилтэт техник, технологийг нэвтрүүлэх замаар үйлчилгээний хүртээмж, шуурхай байдлыг сайжруулах гэсэн тэргүүлэх чиглэлийн зорилтыг хангахад чухал үүрэг гүйцэтгэж байгаа юм. Түүнчлэн, тус байгууллагаас үзүүлж буй бүх төрлийн лавлагаа, үйлчилгээний талаарх шинэчилсэн дэд сайтыг ойрын хугацаанд нэвтрүүлэхээр ажиллаж байна.
Ташрамд дурдахад, 2016 онд Засгийн газрын 136 дугаар тогтоолоор байгуулагдсан Хөгжлийн бэрхшээлтэй хүний эрхийг хангах зөвлөлийн санаачилгаар Хөдөлмөр, нийгмийн хамгааллын яам, Хөгжлийн бэрхшээлтэй хүний хөгжлийн ерөнхий газар хамтран 2019 онд анх удаа зохион байгуулж байсан бөгөөд энэхүү арга хэмжээ нь хөгжлийн бэрхшээлийн талаарх эерэг ойлголт хандлагыг өдөр тутмын үйл ажиллагаандаа хэвшүүлсэн аж ахуй нэгж, албан байгууллагын сайн туршлагыг олон нийтэд түгээх, бусдад үлгэр дууриалал болгох томоохон ач холбогдолтой юм.
УБЕГ-ын Хамтын ажиллагаа, сургалтын хэлтэс
