Монгол Улсын Засгийн газрын 2018 оны 144 дүгээр тогтоолоор баталсан “Нэг иргэн-Нэг бүртгэл” үндэсний хөтөлбөрт заасан зорилтуудыг хэрэгжүүлэх ажлын хүрээнд Монгол Улсын Засгийн газар, БНСУ-ын Олон улсын хамтын ажиллагааны байгууллага буюу КОЙКА-тай хамтран “Улсын бүртгэлийн байгууллагын дэд бүтцийг хөгжүүлэх замаар иргэдэд төрийн үйлчилгээг цахим хэлбэрээр хүргэх төсөл” хэрэгжүүлэхээр тохиролцсон билээ.
Уг ажлын хүрээнд Монгол Улсын Хууль зүй, дотоод хэргийн яам, Сангийн яам болон БНСУ-ын КОЙКА 2020 оны 01 дүгээр сарын 16-ны өдөр Хэлэлцээрийн протоколд гарын үсэг зурж, КОЙКА-гийн буцалтгүй тусламжийн хөрөнгөөр санхүүжих төслийг баталгаажуулсан юм.
Төслийн хэрэгжилтийн өнөөгийн байдал болон цаашдын хамтын ажиллагааны талаар санал солилцохоор Улсын бүртгэлийн ерөнхий газрын дарга Д.Дэлгэрсайхан, Тамгын газрын дарга Г.Цолмон, БНСУ-ын КОЙКА-гийн Монгол Улс дахь суурин төлөөлөгч Жу Хэйн Нан, Суурин төлөөлөгчийн газрын орлогч дарга Ким Сү Янгь болон бусад албаны хүмүүс /2021.01.15/ цахимаар хуралдлаа.
Хуралдаанаар улсын бүртгэлийн байгууллагын аймаг, нийслэл дэх бүртгэлийн бүх нэгжийг орчин үеийн техник, тоног төхөөрөмжөөр хангах компанийг БНСУ-д тендер зарлан шалгаруулсан болохыг дуулгаж, 2022 онд хэрэгжиж дуусах төслийн бусад асуудлаар талууд санал солилцов.
Төслийн хүрээнд улсын бүртгэлийн байгууллагын 21 аймаг, 330 сум болон нийслэлийн 9 дүүрэг, 171 хорооны улсын бүртгэгчийн ашигладаг компьютер болон бусад тоног төхөөрөмжийг иж бүрнээр нь шинэчлэх, мэдээллийн сан, нэгдсэн системийн сервер болон хадгалах төхөөрөмжийг шинэчлэх, мөн мэдээллийн технологийн албан хаагчдын чадавхийг бэхжүүлэх сургалт зохион байгуулах зэрэг ажлуудыг үе шаттайгаар хэрэгжүүлэхээр төлөвлөөд байна.
УБЕГ-ын Хамтын ажиллагаа, сургалтын хэлтэс
