Улсын бүртгэлийн ерөнхий газар болон Дэлхийн банкны “Ухаалаг засаг” төсөл хэрэгжүүлэх нэгжийн хамтарсан цахим уулзалт өнөөдөр /2021.01.13/ боллоо.
“Ухаалаг Засаг” төсөл 2015 оноос хэрэгжиж эхэлсэн бөгөөд төслийн 2-р бүрдэл хэсгийн хүрээнд Улсын бүртгэлийн ерөнхий газарт “Эд хөрөнгийн цахим бүртгэлийн системийг улс орон даяар нэвтрүүлэх” дэд төсөл хэрэгжиж, уг хүрээнд эд хөрөнгийн цахим бүртгэлийн нэгдсэн систем ашиглалтад орж 13 аймгийн эд хөрөнгийн бүртгэлийг цахимжуулах, дээрх аймгуудын бүртгэлийн төвүүдийг төрийн нэгдсэн сүлжээнд холбож, тэдгээрийг ажиллах орчноор хангах, эд хөрөнгийн цахим бүртгэлийн системийн серверийн хүчин чадлыг нэмэгдүүлэх, чадавхийг бэхжүүлэх зэрэг ажлуудыг хийж гүйцэтгэсэн байна.
Өнөөдрийн уулзалтаар “Эд хөрөнгийн эрхийн улсын бүртгэлийн архив болон цахим сургалтын орчинг бүрдүүлэхэд шаардлагатай тоног төхөөрөмж”, “Улсын бүртгэлийн үйлчилгээг цахим хэлбэрээр хүргэхэд шаардлагатай программ хангамжийг хөгжүүлэх” дэд төслүүд амжилттай хэрэгжиж байгааг онцлон дурдаад, төслийн хэрэгжилтийн үйл явц, цаашид анхаарах асуудлуудын талаар харилцан санал солилцлоо. Түүнчлэн, улсын бүртгэлийн 30 төрлийн үйлчилгээг цахим системд нэвтрүүлэх ажил хангагдаж байгаа бөгөөд 80 хувь нь иргэдэд чиглэсэн үйлчилгээ байна хэмээн онцоллоо.
Цахим уулзалтад УБЕГын дарга Д.Дэлгэрсайхан, Мэдээллийн технологийн газрын дарга П.Нэргүй, Дэлхийн банкны дижитал хөгжлийн ахлах мэргэжилтэн, Ухаалаг засаг төслийн багийн ахлагч Сайоу Чью Күек, дэд ахлагч Женнифер Гуй, Төслийн зохицуулагч Ч.Нургул зэрэг холбогдох албаны хүмүүс оролцлоо.
УБЕГ-ын Хамтын ажиллагаа, сургалтын хэлтэс
