Хууль зүйн яам, түүний харъяа агентлаг байгууллагууд, нийслэлийн 6 дүүргийн Засаг даргын Тамгын газар хамтран зохион байгуулсан “Хууль тогтоомж сурталчлах нэгдсэн арга хэмжээ” 9 дүгээр сарын 07-ноос 14-ны өдрүүдэд төвийн зургаан дүүрэгт амжилттай болж өндөрлөлөө.
Энэхүү арга хэмжээнд тус газрын нэгжүүд болон дүүргийн бүртгэлийн хэлтсүүдийн давхардсан тоогоор нийт 70 гаруй албан хаагч идэвхи санаачлагатай оролцож, нийт 12720 иргэнд үйлчилгээ, мэдээлэл зөвлөгөө өгч, гарын авлага тарааж ажиллав. Үүнд:
1. Хууль тогтоомж сурталчлах чиглэлээр:
Улсын бүртгэлийн ерөнхий хууль, Иргэний бүртгэлийн тухай, Эд хөрөнгийн эрхийн бүртгэлийн тухай хууль, Хуулийн этгээдийн улсын бүртгэлийн тухай хууль, холбогдох бусад хууль тогтоомж, журам, зааврын талаар 5800 гаруй иргэнд эрх зүйн зөвлөгөө мэдээлэл өгч ажиллав.
2. Мэдээлэл зөвлөгөө, гарын авлага тараах чиглэлээр:
Үндсэн чиг үүргийн хууль тогтоомжуудаас гадна бүртгэлийн байгууллагын танилцуулга, үйл ажиллагаа, үйлчилгээний бичиг баримтын бүрдүүлэлт, үнэ хураамжийн талаарх гарын авлага, нэрийн хуудас, ном товхимол зэргийг бэлтгэж 4966 иргэнд тарааж ажиллалаа.
3. Үйлчилгээ үзүүлэх чиглэлээр:
- Иргэний цахим үнэмлэхээ гээж үрэгдүүлсэн, гэмтээж хүчинтэй байдал нь алдагдсан 978 иргэний цахим үнэмлэхийн захиалгыг ТҮЦ машины тусламжтайгаар хүлээн авч өдөрт нь хэвлэн иргэдэд буцааж олгов.
- Иргэний үнэмлэхийн хугацаа нь дууссан 42 иргэний материалыг хүлээн авч, зураг, хурууны хээгээр бүртгэн цахим үнэмлэхийн 25, 45 насны хугацааны сунгалтын үйлчилгээг үзүүлэв.
- Үндэсний энгийн гадаад паспортын хүчинтэй хугацаа нь дууссан 934 иргэний материалыг хүлээн авч тухайн өдрүүдэд өдөрт нь буцаан олгох ажлыг зохион байгуулав.
---oOo---
