Азийн хөгжлийн банкны техникийн туслалцааны дэмжлэгтэй хэрэгжиж буй төслийн нээлтийн семинар зохион байгуулагдлаа

Улсын бүртгэлийн байгууллагад Азийн хөгжлийн банкны техникийн туслалцааны дэмжлэгтэйгээр хэрэгжиж эхлээд буй “ТА10201-МОН: Сумдад эд хөрөнгийн болон хуулийн этгээдийн улсын бүртгэлийн үйлчилгээг цахимжуулах, нэвтрүүлэх замаар төрийн үйлчилгээг бэхжүүлэх, төвлөрлийг сааруулах” төслийн нээлтийн семинар өнөөдөр буюу 2024 оны 04 дүгээр сарын 04-ний өдөр зохион байгуулагдлаа.
Нээлтийн семинарт Хууль зүй, дотоод хэргийн яамны Бодлогын хэрэгжилтийг зохицуулах газрын дарга Л.Нямгэрэл, Азийн хөгжлийн банкны Монгол Улс дахь Суурин төлөөлөгчийн газрын ахлах эдийн засагч Эдвард Фабер тэргүүтэй холбогдох албаны хүмүүс урилгаар оролцсон бөгөөд бүртгэлийн байгууллагын нийт албан хаагчид танхим болон цахимаар оролцов.

/Л.Нямгэрэл, ХЗДХЯ-ны Бодлогын хэрэгжилтийг зохицуулах газрын дарга/

Хууль зүй, дотоод хэргийн яамны Бодлогын хэрэгжилтийг зохицуулах газрын дарга Л.Нямгэрэл семинарыг нээн “Азийн хөгжлийн банк нь Монгол улсад олон төсөл хэрэгжүүлсээр ирсэн. Тэдгээр төслүүдийг хэрэгжүүлсэн байгууллагууд дундаас Улсын бүртгэлийн байгууллага нь Хууль зүйн салбарт төдийгүй Засгийн газрын хэмжээнд үнэлэгдэхүйц, амжилттай төсөл хэрэгжүүлдэг туршлагатай хамт олон юм” хэмээн тодотгон төслийн хэрэгжилтэд амжилт хүсэв.

/Эдвард Фабер, АХБ-ны Монгол Улс дахь Суурин төлөөлөгчийн газрын ахлах эдийн засагч /

Азийн хөгжлийн банкны Монгол Улс дахь Суурин төлөөлөгчийн газрын ахлах эдийн засагч Эдвард Фабер: "Азийн хөгжлийн банк нь 1991 оноос Монгол улстай нягт хамтран ажилласаар ирсэн түүхтэй. Энэ удаагийн төсөл маань төрийн үйлчилгээний төвлөрлийг сааруулах, тэр дундаа сумдад төрийн үйлчилгээг хүргэнэ гэдгээрээ онцлогтой. Төслийн үр дүнд 200 орчим сумдын 500.000 гаруй иргэн, 100.000 гаруй ААН ашиг хүртэхээр тооцоологдсон байгаа бөгөөд тэдгээрийн 50%-иас доошгүй хувь нь эмэгтэйчүүд байх юм" хэмээн нээлтийн  семинарт хүрэлцэн ирсэн зочид, оролцогчдод талархал илэрхийлэв. 

/Б.Батзаяа, АХБ-ны Монгол Улс дахь Cуурин төлөөлөгчийн газрын Хөрөнгө оруулалтын ахлах мэргэжилтэн бөгөөд Төслийн удирдагч/

/Д.Дэлгэрсайхан, УБЕГ-ын дарга бөгөөд Төслийн удирдах хорооны дарга/

/Б.Ариунболд, УБЕГ-ын Эд хөрөнгийн эрхийн улсын бүртгэлийн газрын дарга/

Төслийн хүрээнд эд хөрөнгийн эрхийн болон хуулийн этгээдийн улсын бүртгэлийн үйлчилгээг сумдад нэвтрүүлэх замаар төрийн үйлчилгээний төвлөрлийг сааруулах, улсын бүртгэлийн бүх үйлчилгээг анхан шатны нэгжээс үзүүлэх, системийн чанарыг сайжруулах, цахим сүлжээний нууцлал, аюулгүй байдал, хэвийн найдвартай ажиллагааг хангах, тоног төхөөрөмж, програм хангамжийг шинэчлэх, иргэн, хуулийн этгээдэд төрийн үйлчилгээг орон зайнаас үл хамааран цахим хэлбэрээр хүртээмжтэй хүргэх нөхцлийг бүрдүүлэх, суурь мэдээллийг бусад байгууллагатай солилцох болон албан хаагчдын чадавхыг бэхжүүлэх, олон улсын сайн туршлага нэвтрүүлэх зэрэг ажлуудыг үе шаттайгаар хэрэгжүүлэхээр төлөвлөн ажиллаж байна. 

УБЕГ-ын Хамтын ажиллагаа, сургалтын хэлтэс