ЦАХИМ ШИЛЖИЛТ, МЭДЭЭЛЭЛ СОЛИЛЦООГ САЙЖРУУЛАХ ЧИГЛЭЛЭЭР ХУРАЛ ЗОХИОН БАЙГУУЛЛАА

Төрийн үйл ажиллагааг цахимжуулах, иргэн, хуулийн этгээдэд төрийн үйлчилгээг цахим хэлбэрээр хүргэх, төрд байгаа мэдээллийг иргэн, хуулийн этгээдээс дахин шаардахгүй байх, “Цахимаар түрүүнд” зарчимд шилжихтэй холбогдуулан мэдээлэл солилцооны өнөөгийн нөхцөл байдал, цахим шилжилтийн явцын талаар танилцах, цаашид шаардлагатай дэмжлэгийг тодорхойлох зорилгоор Улсын бүртгэлийн ерөнхий газраас 2026 оны 09 дүгээр сарын 11-ний өдөр холбогдох байгууллагуудын хамтарсан хурлыг зохион байгууллаа.

Хуралд Засгийн газрын Хэрэг эрхлэх газрын дэд дарга С.Тэнгис, Хууль зүй, дотоод хэргийн яамны Мэдээллийн технологийн хэлтсийн дарга О.Чинзориг, Улсын бүртгэлийн ерөнхий газрын дарга Д.Давааням болон газар, хэлтсийн дарга, холбогдох албан хаагчид, Төрийн цахим үйлчилгээний зохицуулалтын газар, “E-Mongolia” академи, Нийгмийн даатгалын ерөнхий газар, Санхүүгийн мэдээллийн технологийн газар зэрэг байгууллагын төлөөллүүд оролцов.

Тус хурлаар төрийн байгууллагуудын хоорондын мэдээлэл солилцооны нөхцөл байдал, цахим шилжилтийн явц, төрийн мэдээллийг дахин шаардахгүй байх боломж, цахим үйлчилгээг уялдаа холбоотойгоор хөгжүүлэх асуудлаар мэдээлэл солилцож, цаашид хэрэгжүүлэх арга хэмжээ, шаардлагатай дэмжлэгийн талаар санал солилцлоо. Мөн цахим шилжилтийг эрчимжүүлэх хүрээнд байгууллага хоорондын мэдээллийн уялдаа, мэдээлэл солилцоог сайжруулах, иргэн, хуулийн этгээдэд төрийн үйлчилгээг шуурхай, хүртээмжтэй, давхардалгүйгээр цахим хэлбэрээр хүргэх чиглэлээр хамтран ажиллах асуудлыг хэлэлцэв.

Хурлын үр дүнд холбогдох байгууллагуудын мэдээлэл солилцоог боловсронгуй болгох, түүнчлэн цахим шилжилтийн хэрэгжилтийг эрчимжүүлэх, тулгамдаж буй асуудлуудыг шийдвэрлэх чиглэлээр цаашид хамтран ажиллахаар санал нэгдлээ.