ЭД ХӨРӨНГИЙН ЭРХИЙН УЛСЫН БҮРТГЭЛИЙН "Е- PROPERTY" СИСТЕМ, ЦАХИМААР БАРЬЦААНЫ ЭРХ БҮРТГЭХ СИСТЕМИЙН НЭЭЛТИЙН НЭГДСЭН СУРГАЛТ БОЛЛОО

Эд хөрөнгийн эрхийн улсын бүртгэлийн шинэчлэн хөгжүүлсэн “e-Property” систем, мөн цахим хэлбэрээр хийсэн хэлцэл болон цахимаар барьцааны эрх хүлээн авч бүртгэл хөтлөх системийг эд хөрөнгийн эрхийн улсын бүртгэл хөтлөх үйл ажиллагаанд улсын хэмжээнд нэвтрүүлэх бэлтгэл ажлын хүрээнд нэгдсэн сургалтыг зохион байгуулж байна.

Тус сургалт 2026 оны 09 дүгээр сарын 10-11-ний өдрүүдэд Улсын бүртгэлийн ерөнхий газрын төв байранд зохион байгуулагдаж байгаа бөгөөд аймаг, нийслэлийн Улсын бүртгэлийн хэлтсийн Эд хөрөнгийн эрхийн улсын бүртгэлийн тасгийн дарга бөгөөд улсын ахлах бүртгэгч, мэдээллийн технологийн албан хаагчид хамрагдаж байна.

Сургалтаар Эд хөрөнгийн эрхийн улсын бүртгэлийн тухай хууль, холбогдох хууль тогтоомжийг хэрэгжүүлэх, шинэчлэн хөгжүүлсэн “e-Property” системийн хэрэглээ, давуу тал, системд бүртгэл хөтлөхөд анхаарах асуудал, эрхийн улсын бүртгэлийг нэгдсэн арга зүйгээр хөтлөх, системийн ашиглалт, мэдээллийн технологи болон тоног төхөөрөмжийн бэлэн байдлыг хангах чиглэлээр мэдлэг, дадлага олгох юм.

Мөн сургалтын хүрээнд “e-Property” системийг нэвтрүүлэн ажиллаж буй Баянзүрх дүүргийн Улсын бүртгэлийн хэлтэст сургалтад хамрагдаж буй албан хаагчид ажиллаж, шинэ системээр эд хөрөнгийн эрхийн улсын бүртгэл хөтлөх үйл ажиллагаатай танилцан, практик дадлага хийнэ.

Тус нэгдсэн сургалтыг зохион байгуулснаар “e-Property” системийг улсын хэмжээнд нэвтрүүлэх бэлтгэл ажлыг хангах, бүртгэл хөтлөлтийн нэгдсэн арга зүйг төлөвшүүлэх, цахим үйлчилгээний чанар, хүртээмжийг нэмэгдүүлэх чухал ач холбогдолтой юм.