Улсын бүртгэлийн ерөнхий газраас эд хөрөнгийн эрхийн улсын бүртгэлийн үйлчилгээний чанар, хүртээмжийг нэмэгдүүлэх, бүртгэлийн үйл ажиллагааг шуурхай, боловсронгуй болгох зорилгоор эд хөрөнгийн эрхийн улсын бүртгэлийн “E-PROPERTY” шинэчилсэн системийг үе шаттайгаар нэвтрүүлж байна.
Шинэчилсэн системийг нэвтрүүлснээр эд хөрөнгийн эрхийн улсын бүртгэлийн лавлагаа, маягтыг улсын бүртгэгч тоон гарын үсгээр баталгаажуулан олгох, лавлагааны нэр төрлийг нэмэгдүүлэх, иргэн, хуулийн этгээд өөрийн хэрэгцээ, шаардлагад нийцүүлэн шаардлагатай лавлагаа, мэдээллийг авах боломж бүрдэж байна.
Үүнтэй холбогдуулан эд хөрөнгийн эрхийн улсын бүртгэлийн үйл ажиллагаанд ашиглах мэдүүлэг, маягт, лавлагааны загваруудыг Улсын бүртгэлийн ерөнхий газрын даргын 2026 оны 08 дугаар сарын 24-ний өдрийн А/168 дугаар тушаалаар шинэчлэн баталсан.
Шинэчлэгдсэн загварт эд хөрөнгийн эрхийн улсын бүртгэлийн мэдүүлэг, цахим хэлбэрээр гаргасан мэдүүлгийг хүлээн авах эсэх болон бүртгэхээс татгалзсан тухай мэдэгдэл, эд хөрөнгийн эрхийн улсын бүртгэлийн маягтууд багтсан бөгөөд дараах төрлийн лавлагааг шинээр ашиглаж эхэлнэ. Үүнд:
- Эд хөрөнгийн эрхийн улсын бүртгэлийн лавлагаа /Э-01/
- Эд хөрөнгө бүртгэлтэй эсэх лавлагаа /Э-02/
- Эд хөрөнгө бүртгэлгүй тухай лавлагаа /Э-03, Э-04/
- Эд хөрөнгийн эрхийн улсын бүртгэлийн дэлгэрэнгүй лавлагаа /Э-05/
- Үл хөдлөх эд хөрөнгө өмчлөх эрх болон түүнтэй холбоотой бусад эрхийн улсын бүртгэлийн лавлагаа /Э-06/
- Эрхийн улсын бүртгэлд урьдчилсан тэмдэглэл бүртгэлтэй эсэх лавлагаа /Э-07/
- Эрхийн улсын бүртгэлд тусгай тэмдэглэл бүртгэлтэй эсэх лавлагаа /Э-08/
- Эрхийн улсын бүртгэлд нэмэлт, өөрчлөлт оруулсан тухай лавлагаа /Э-09/
“E-PROPERTY” шинэчилсэн системийг Баянзүрх дүүрэгт 2026 оны 08 дугаар сарын 27-ны өдрөөс нэвтрүүлж, эд хөрөнгийн эрхийн улсын бүртгэлийн лавлагаа, мэдээллийг улсын бүртгэгчийн тоон гарын үсгээр баталгаажуулан олгож эхэллээ.
Ингэснээр иргэн, хуулийн этгээд эд хөрөнгийн эрхийн улсын бүртгэлийн лавлагаа, мэдээллийг илүү шуурхай, найдвартай авах, бүртгэлийн үйл ажиллагааг цахим хэлбэрээр хялбаршуулах боломж бүрдэх юм.
Цаашид дээрх шинэчилсэн мэдүүлэг, маягт, лавлагааг “E-PROPERTY” системийг тухайн бүртгэлийн нэгжид нэвтрүүлсэн өдрөөс эхлэн мөрдөж ажиллана.
