E-Business 2.0 системийн сайжруулалтын хүрээнд бизнес эрхлэх иргэдийн цаг хугацаа, зардлыг хэмнэж, төрийн үйлчилгээг бүрэн цахим хэлбэрт шилжүүлэхэд чиглэсэн хэд хэдэн томоохон хөгжүүлэлтийг хийлээ.
Хуулийн этгээдийн нэрийн давхардал, төстэй байдлыг илүү нарийвчлалтай тодорхойлох зорилгоор хиймэл оюун ухаанд (AI) суурилсан нэр шүүх, баталгаажуулах системийг хөгжүүллээ.
Энэхүү шинэчлэл нь нэр сонгох үйл явцыг хөнгөвчилж, бүртгэлийн шийдвэрийг илүү шуурхай гаргах нөхцөлийг бүрдүүлж байгаа юм.
Улсын бүртгэлийн байгууллага нь И-Монгол академитай хамтран шинээр үүсгэн байгуулагдах хуулийн этгээдийн бүртгэлийн үйлчилгээг олон улсын жишигт нийцүүлэн бүрэн цахим хэлбэрт шилжүүлэх хөгжүүлэлтийн ажлыг хэрэгжүүллээ.
Уг хөгжүүлэлтийн хүрээнд иргэн шаардлагатай баримт бичгээ тоон гарын үсгээр баталгаажуулан цахимаар илгээх, улсын бүртгэгч цахим орчинд хянан шийдвэрлэх боломж бүрдэж байна.
Шинээр үүсгэн байгуулагдаж буй хуулийн этгээдүүд улсын бүртгэлийн үйлчилгээг авахын зэрэгцээ банкны дансаа цахимаар нээх боломжтой болсон. Ингэснээр иргэн банканд биечлэн очих шаардлагагүй болж, үйл ажиллагаагаа эхлүүлэхэд шаардагдах хугацаа багасаж байна.
