Улсын бүртгэлийн ерөнхий газраас эд хөрөнгийн эрхийн улсын бүртгэлийн үйлчилгээг цахимжуулах, бүртгэлийн үйл ажиллагааг боловсронгуй болгох зорилгоор шинэчилсэн “E-PROPERTY” системийг үе шаттайгаар нэвтрүүлэн ажиллаж байна.
Шинэчилсэн системийг Баянзүрх дүүрэгт 2026 оны 08 дугаар сарын 27-ны өдрөөс нэвтрүүлж, эд хөрөнгийн эрхийн улсын бүртгэлийн лавлагаа, мэдээллийг улсын бүртгэгчийн тоон гарын үсгээр баталгаажуулан олгож эхэлсэн бөгөөд тус системд ашиглах мэдүүлэг, маягт, лавлагааны загварыг Улсын бүртгэлийн ерөнхий газрын даргын 2026 оны 08 дугаар сарын 24-ний өдрийн А/168 дугаар тушаалаар мөн шинэчлэн баталсан.
Энэхүү ажлын хүрээнд Улсын бүртгэлийн ерөнхий газар 2026 оны 09 дүгээр сарын 06-ны өдөр Богд банктай хамтын ажиллагааны гэрээнд гарын үсэг зурлаа.
Хамтын ажиллагааны хүрээнд банкны харилцагчийн зөвшөөрөлд үндэслэн барьцааны эрхийг улсын бүртгэлд бүртгүүлэх, мөн барьцааны эрх дуусгавар болсныг бүртгэх үйлчилгээг цахимаар үзүүлэх боломж бүрдэж байна. Ингэснээр банк, харилцагчийн барьцаатай холбоотой бүртгэлийг цахимаар хийх нөхцөл бүрдэж, улсын бүртгэлийн үйлчилгээг иргэн, хуулийн этгээдэд илүү шуурхай, хүртээмжтэй хүргэхийн зэрэгцээ цахим үйлчилгээний хүрээг өргөжүүлэх ач холбогдолтой юм.
