Хууль зүй, дотоод хэргийн яамны санаачилгаар хэрэгжүүлж буй "ИРГЭН ТӨВТ ТӨРИЙН ҮЙЛЧИЛГЭЭ", "ХУУЛИА ДЭЭДЭЛЖ - ХАРИУЦЛАГАА УХАМСАРЛАЯ" сэдэвт бүх нийтийн эрх зүйн боловсрол, өргөдөл, гомдлын шийдвэрлэлтийн нэгдсэн аяны хүрээнд иргэн та Улсын бүртгэлийн байгууллагын үйлчилгээ болон үйл ажиллагаатай холбоотой санал, хүсэлт, өргөдөл, гомдлоо дараах сувгуудаар ирүүлэх боломжтой.
Энэхүү аяныг 2026 оны 07 дугаар сарын 24-ний өдрөөс 08 дугаар сарын 24-ний өдрийн хугацаанд зохион байгуулах бөгөөд аяны зорилго нь иргэдэд хууль, эрх зүйн мэдлэг, мэдээллийг хүртээмжтэй хүргэх, төрийн байгууллагын үйлчилгээний соёлыг төлөвшүүлэх, төрийн байгууллагын үйлчилгээний ил тод, шуурхай байдлыг нэмэгдүүлэх, өргөдөл, гомдлыг хуульд заасан хугацаанд чанартай, шуурхай шийдвэрлэх, улмаар иргэдийн төрд итгэх итгэлийг бэхжүүлэхэд оршино.
Иргэд улсын бүртгэлийн байгууллагын үйлчилгээ, үйл ажиллагаатай холбоотой мэдээ мэдээллийг Улсын бүртгэлийн байгууллагын албан ёсны цахим хуудас burtgel.gov.mn болон "Улсын бүртгэлийн ерөнхий газар" гэсэн фэйсбүүк пэйжээр дамжуулан авах боломжтой. Мөн холбогдох санал, хүсэлт, өргөдөл гомдлыг contact@burtgel.gov.mn цахим хаягаар, 1800-1890 лавлах утсаар, Улсын бүртгэлийн ерөнхий газар болон аймаг, дүүргийн Улсын бүртгэлийн хэлтсүүдэд байршуулсан санал хүсэлтийн хайрцагаар дамжуулан ирүүлэхээс гадна Засгийн газрын Иргэд олон нийттэй харилцах төвийн 11-11 лавлах утсаар санал, гомдлоо илэрхийлэх боломжтой.
Улсын бүртгэлийн байгууллагад 2026 оны эхний хагас жилийн байдлаар 1745 иргэнээс санал, хүсэлт, 622 иргэнээс гомдол, мэдээлэл ирүүлсний 94%-ийг буюу 2226 иргэний санал, хүсэлт, өргөдөл, гомдлыг хуульд заасан хугацаанд шийдвэрлэсэн үзүүлэлттэй байна.
