Хууль зүй, дотоод хэргийн салбарын “Нээлттэй хаалганы өдөрлөг” 2026 оны 04 дүгээр сарын 27, 28, 29-ний өдрүүдэд Д.Сүхбаатарын талбай-д амжилттай зохион байгуулагдлаа.
Тус өдөрлөгт Хууль зүй, дотоод хэргийн яамны харьяа агентлаг, байгууллагууд өргөн бүрэлдэхүүнтэй оролцож, иргэдэд төрийн үйлчилгээг нэг дороос авах боломжийг бүрдүүлэв. Улсын бүртгэлийн байгууллага иргэдэд Иргэний улсын бүртгэл, Хуулийн этгээдийн улсын бүртгэл, Эд хөрөнгийн эрхийн улсын бүртгэл, Архивын лавлагааны чиглэлээр үйлчилгээг шуурхай үзүүлэн ажиллалаа.
Өдөрлөгийн үеэр Улсын бүртгэлийн ерөнхий газар нь Авлигатай тэмцэх газрын товч аппликейшнийг олон нийтэд сурталчлан таниулж, иргэдийн авлигын эсрэг мэдлэг, ойлголтыг нэмэгдүүлэхэд чиглэсэн үйл ажиллагааг хэрэгжүүллээ.
Түүнчлэн Улсын бүртгэлийн байгууллагын түүхэн замнал, хөгжлийг харуулсан үзэсгэлэнг дэлгэн танилцуулж, иргэд олон нийтэд салбарын үйл ажиллагаа, ололт амжилтыг сурталчилсан нь онцлог байв.
