Татварын ерөнхий хууль (шинэчилсэн найруулга)-ийг дагаж мөрдөх журмын тухай хуулийн 9 дүгээр зүйлд заасны дагуу хуулийн этгээд нь эцсийн өмчлөгчийн мэдээллээ улсын бүртгэлд бүртгүүлэх үүрэг хүлээдэг.
Иймд хуулийн этгээд эцсийн өмчлөгчийн мэдээллийг улсын бүртгэлд бүртгүүлэхдээ дараах баримт бичгийг бүрдүүлэн аймаг, дүүргийн улсын бүртгэлийн хэлтэс болон нийслэлийн үйлчилгээний нэгдсэн төвд хандан бүртгүүлнэ. Үүнд:
- Хуулийн этгээдийн эцсийн өмчлөгчийн мэдээллийг улсын бүртгэлд бүртгүүлэх өргөдөл (УБ-12 маягт) – маягтыг үнэн зөв бөглөж, шаардлагатай хавсралтын хамт ирүүлэх; https://burtgel.gov.mn/service/index.php/les-newlist/download
- Улсын тэмдэгтийн хураамж төлсөн баримт;
- Эцсийн өмчлөгч нь гадаадын иргэн бол паспортын хуулбар болон F-регистр бүхий оршин суух зөвшөөрлийн үнэмлэхийн хуулбар;
- Үргэлжилсэн хэлхээ холбоо бүхий гадаадын хуулийн этгээдтэй бол тухайн улсын эрх бүхий байгууллагаар баталгаажуулсан хуулийн этгээдийн гэрчилгээний хуулбар, түүний орчуулгын баталгаажуулсан хувь.
Мөн хуулийн этгээд нь цахимаар бүртгүүлэх боломжтой бөгөөд E-Business.mn системд нэвтэрч “Хуулийн этгээдийн эцсийн өмчлөгч өөрчлөх” үйлчилгээг сонгон бүртгэлээ хийж болно.
Дараах хуулийн этгээдүүд 2026 оны 07 дугаар сарын 01-ний өдрийн дотор эцсийн өмчлөгчийн мэдээллээ улсын бүртгэлд бүртгүүлээгүй тохиолдолд улсын бүртгэлийг түдгэлзүүлэх арга хэмжээ авах бөгөөд үүний улмаас санхүү, татвар, нийгмийн даатгалын тайлан илгээх боломж хязгаарлагдах, мөн тендер шалгаруулалтад оролцох эрхгүй болох зэрэг эрсдэл үүсэхийг анхааруулж байна.
