Азийн хөгжлийн банкны Техникийн туслалцааны төсөл амжилттай хэрэгжиж дууслаа

Улсын бүртгэлийн ерөнхий газар Азийн хөгжлийн банкны Техникийн туслалцааны дэмжлэгтэйгээр 2024-2026 онд хэрэгжүүлсэн “ТА10201-МОН: Сумдад эд хөрөнгийн эрхийн болон хуулийн этгээдийн улсын бүртгэлийн үйлчилгээг цахимжуулах, нэвтрүүлэх замаар төрийн үйлчилгээг бэхжүүлэх, төвлөрлийг сааруулах” төслийн хэрэгжилтийн үр дүнг танилцуулах, дүгнэх хаалтын семинарыг өнөөдөр зохион байгууллаа.

Энэхүү төслөөр эд хөрөнгийн эрхийн болон хуулийн этгээдийн улсын бүртгэлийн системийг шинэчлэн хөгжүүлэх, өргөтгөх, цахим үйлчилгээг төгөлдөршүүлэхийн зэрэгцээ шаардлагатай компьютер, тоног төхөөрөмжөөр хангах, албан хаагчдын чадавхыг бэхжүүлэхэд онцгойлон анхаарч ажилласан байна.

Улсын бүртгэлийн ерөнхий газрын дарга Д.Давааням: “Улсын бүртгэлийн байгууллага нь төрийн үйлчилгээний 65–70 гаруй хувийг үзүүлж, нийт 112 төрлийн үйлчилгээг нийслэл, дүүрэг, хороо, аймаг, сумдад хүргэн ажиллаж байна. Энэхүү төслийн үр дүнд мэдээллийн сан, программ хангамж, дэд бүтэц шинэчлэгдэж, байгууллагуудын мэдээлэл солилцоо илүү боловсронгуй боллоо. Мөн эд хөрөнгийн эрхийн болон хуулийн этгээдийн улсын бүртгэлийн үйлчилгээг сумдаас авах боломжийг бүрдүүлснээр иргэд аймаг руу зорчих шаардлагагүй болж, цаг хугацаа, зардлаа хэмнэх нөхцөл бүрдсэнд бид талархалтай байна” хэмээн онцоллоо.

Тэрбээр төслийг амжилттай хэрэгжүүлэхэд дэмжлэг үзүүлсэн Азийн хөгжлийн банканд талархал илэрхийлэв.

Төслийн хаалтын семинарт Улсын бүртгэлийн ерөнхий газрын удирдлагууд, Азийн хөгжлийн банкны Монгол Улс дахь суурин төлөөлөгчийн газрын ахлах эдийн засагч Мартино Пелли, Хувийн хэвшлийн хөгжил хариуцсан ахлах мэргэжилтэн, Төслийн удирдагч Б.Батзаяа, төслийн болон холбогдох байгууллагуудын төлөөлөл оролцлоо.