Иргэдэд үзүүлэх төрийн үйлчилгээг түргэн шуурхай, чирэгдэлгүй хүргэх, үйлчилгээний шат дамжлагыг бууруулах зорилтын хүрээнд Улсын бүртгэлийн ерөнхий газрын даргын тушаалаар нийслэлийн 9 дүүргийн Нэгдсэн үйлчилгээний төв, цэгийн ахлах бүртгэгчдэд хяналтын улсын байцаагчийн эрх олголоо.
Өмнө нь иргэн Нэгдсэн үйлчилгээний төв болон цэгүүдэд улсын бүртгэлийн үйлчилгээ авах хүсэлт гаргахад хяналтын улсын байцаагчийн дүгнэлт шаардлагатай тохиолдолд дүүргийн Улсын бүртгэлийн хэлтэст биечлэн очих шаардлага үүсдэг байсан. Энэ нь улсын бүртгэлийн үйлчилгээ авахад цаг хугацаа алдах, иргэдэд чирэгдэл үүсгэдэг байв.
Ийнхүү төрийн үйлчилгээний шат дамжлагыг бууруулж, улсын бүртгэлийн үйлчилгээний хүртээмж, шуурхай байдлыг нэмэгдүүлэх чухал зохицуулалт хэрэгжиж эхэллээ.
