Сонгогч Та Монгол Улсын Ерөнхийлөгчийн сонгуулийн тухай хуульд заасны дагуу өөрийн харъяа хэсгийн хорооны санал авах байранд иргэний үнэмлэхтэйгээ очиж, биеийн давхцахгүй өгөгдөл /гарын хурууны хээ/-өө иргэний бүртгэлийн итгэмжлэгдсэн ажилтанд шалгуулна.
Тус газар сонгуулийн санал авах өдөр сонгогчдийг бүртгэх, таних тоног төхөөрөмж, техник хэрэгслийн аюулгүй, найдвартай, хэвийн үйл ажиллагааг хангах зорилгоор 1896 сонгуулийн хэсэг тус бүрт мэдээллийн технологийн 2-3 хүний бүрэлдэхүүнтэй шуурхай баг ажиллуулахаар бэлтгэл ажлыг хангалаа.
Иргэний бүртгэлийн итгэмжлэгдсэн ажилтнуудын сургалт, семинар дууссантай холбогдуулан сонгогчдийн нэрийн жагсаалтыг эцсийн байдлаар хэсгийн хороо тус бүрээр гаргаж аймаг, нийслэлийн хэсгийн нийт 1896 хэсгийн хороонд хүлээлгэн өгч дууслаа.
Улсын бүртгэлийн ерөнхий газраас Ерөнхийлөгчийн сонгуульд тухай хуульд заасны дагуу 60 хоногийн хугацаанд шилжилт хөдөлгөөнийг улсын хэмжээнд түр зогсоосон бөгөөд улмаар иргэдийн санал өгөх эрхийг хангах зорилгоор хуульд нийцүүлэн анх удаа сонгогч шилжих тухай журмыг батлан хэрэгжүүлэв.
Энэ удаагийн ерөнхийлөгчийн сонгуулиар улсын хэмжээнд 1896 хэсэгт 2501 иргэний бүртгэлийн итгэмжлэгдсэн ажилтан ажиллуулахаар тус газар бэлтгэл ажлыг хангаад байна.
Өнөөдөр Улсын бүртгэлийн ерөнхий газар Сонгуулийн ерөнхий хороо, Гадаад харилцааны яамтай хамтран сэтгүүлчдэд мэдээлэл хийлээ.