Хуулийн этгээдийн улсын бүртгэгч нарыг мэргэшүүлэх сургалт эхэллээ

Улсын бүртгэлийн ерөнхий газрын Тамгын газар болон Хуулийн этгээдийн улсын бүртгэлийн газраас зохион байгуулж буй Хуулийн этгээдийн улсын бүртгэгч нарыг мэргэшүүлэх сургалт өнөөдөр /2019.10.05/ нийслэлд эхэллээ.  

 

Сургалт хоёр өдөр үргэлжлэх ба сургалт, зөвлөгөөнд УБЕГ-ын Хуулийн этгээдийн улсын бүртгэлийн газар болоод 21 аймаг, нийслэлийн Багануур дүүргийн Улсын бүртгэлийн хэлтсийн хуулийн этгээдийн улсын бүртгэгч гээд нийт 50 гаруй албан хаагчид хамрагдаж байна.

 

 

 

Улсын бүртгэлийн хууль тогтоомж болон хуулийн этгээдийн бүртгэлийн шинэ системийг танилцуулах ажлын хүрээнд албан хаагчдын хууль эрх зүйн мэдлэгийг дээшлүүлэх, бүртгэлийн үйл ажиллагаанд мөрдөгдөх эрх зүйн актуудын талаар нэг мөр ойлголт өгөх зорилгоор энэхүү арга хэмжээ зохион байгуулагдаж байгаа юм.

 

 

Сургалтыг УБЕГ-ын Хуулийн этгээдийн улсын бүртгэлийн газрын дарга Ж.Аюуш удирдаж, УБЕГ-ын дэд дарга Д.Дэлгэрсайхан нээж үг хэлэв. Тэрбээр хэлсэн үгэндээ, “Өнөөдөр ХУР системээр үйлчлүүлж буй төрийн болон хувийн байгууллагуудын тоо ихэссэн. Улсын бүртгэлийн байгууллага бол уг системийг мэдээллээр хангаж буй байгууллага юм. Иймд та бүхэнд гурван зүйлийг анхааруулахад УБЕГ-аас барьж буй бодлогын хувьд иргэдэд үзүүлж буй үйлчилгээг нэгж шат руугаа чиглүүлэх, өөрөөр хэлбэл төвлөрлөлийг саармагжуулах явдал. Мөн бүртгэлийн хугацааг аль болгон түргэн шуурхай, чанартай, иргэдэд чиглэлсэн байхад анхаарах хэрэгтэй. Түүнчлэн программ хангамжийн шинэ систем нэвтрэхэд хэдийгээр олон бэрхшээл тулгарах боловч энэ нь нөгөө талаараа дэвшил, амжилт юм. Иймд Та бүхэн энэхүү хоёр өдрийн сургалтаараа мэргэшсэн боловсон хүчин болоход өөрийгөө нэг шат ахиулж, төрийн албаны нэр хүнд, ёс зүй, хэм хэмжээг чанд баримталсан үлгэр дуурайлал байхыг хүсье” гэв.

 

Ингээд өнөөдрийн сургалтын эхэнд УБЕГ-ын Эрх зүй, гадаад харилцааны хэлтсийн ахлах мэргэжилтэн Ж.Чиймаа “Улсын бүртгэлийн ерөнхий хууль болон Хуулийн этгээдийн улсын бүртгэлийн тухай хуулийн онцлог зохицуулалт, анхаарах асуудал” сэдвээр хичээл заав.

Тэрбээр, Монгол Улсын Засгийн газрын тогтоолоор батлагдсан дүрэм, журам; Хууль зүй, дотоод хэргийн сайдын тушаалаар батлагдсан дүрэм, журам; Улсын бүртгэлийн ерөнхий газрын даргын тушаалаар батлагдсан дүрэм, журам; мөн Улсын бүртгэлийн ерөнхий хуулийн онцлог зохицуулалт; Хуулийн этгээдийн улсын бүртгэлийн хууль, дагаж мөрдөх журам болон онцлог зохицуулалтын талаар дэлгэрэнгүй мэдээлэл хийв. Түүнчлэн гэрчилгээ болон тамга тэмдгийн хяналтын дугаар дахин авах; Хуулийн этгээдийг улсын бүртгэлээс хасахад юунд анхаарах талаар тайлбарласан юм.

 

 

 

 

 

 

Үргэлжлүүлэн “Татварын багц хууль дахь хуулийн этгээдийн улсын бүртгэлтэй холбоотой анхаарах асуудал” сэдвээр Татварын ерөнхий газрын Татвар төлөгчтэй харилцах газрын Улсын ахлах байцаагч Я.Батжаргал.

 

“Эдийн засгийн бүх төрлийн үйл ажиллагааны шинэчилсэн ангилал, анхаарах асуудал” сэдвээр Үндэсний статистикийн хорооны Үндэсний тооцоо, шинжилгээ судалгааны газрын статистикч Т.Алтансүх.

 

“Хуулийн этгээдийн бүртгэлийн мэдээллийн ашиглалт, үзүүлэлт хоорондын уялдаа” сэдвээр Үндэсний статистикийн хорооны Эдийн засгийн статистикийн газрын ахлах статистикч Д.Оюунбилэг.

 

“Мөнгө угаах болон терроризмыг санхүүжүүлэхтэй тэмцэх тухай хууль” болон эцсийн өмчлөгчийг тогтоох тухай сэдвээр Монголбанкны Ерөнхийлөгчийн хуулийн зөвлөх Б.Гантуяа.

 “Төрийн албан хаагчийн ёс зүй, байгууллагын үйлчилгээний стандарт” сэдвээр УБЕГ-ын Захиргаа, хүний нөөцийн хэлтсийн дарга Г.Мөнхцэцэг.

 

“Хяналт шалгалтаар илэрч буй нийтлэг зөрчлүүд, анхаарах асуудал” сэдвээр УБЕГ-ын Хяналт шалгалтын газрын Хяналтын улсын байцаагч Т.Золбаяр.

 

“Хадгаламж зээлийн хоршоог улсын бүртгэлд бүртгэхэд анхаарах асуудал” сэдвээр Санхүүгийн зохицуулах хорооны Хяналт шалгалт, зохицуулалтын газрын дарга Б.Долгорсүрэн.

 

“Төрийн албан хаагчийн гүйцэтгэлийн төлөвлөгөө боловсруулах, тайлагнахад анхаарах асуудал” сэдвээр УБЕГ-ын Хяналт шинжилгээ, үнэлгээ, дотоод аудитын газрын ахлах мэргэжилтэн Ш.Уртнасан тус тус илтгэл тавилаа.

 

Ийнхүү “Хуулийн этгээдийн улсын бүртгэгч нарыг мэргэшүүлэх сургалт”-ын эхний өдөр амжилттай өндөрлөж, маргааш /2019.10.06/ Улсын бүртгэлийн ерөнхий газрын төв байранд сургалт, дадлага ажлаар үргэлжлэх болно.

ХАРИЛЦАХ

Засгийн газрын хэрэгжүүлэгч агентлаг - Улсын бүртгэлийн ерөнхий газар 14171 Улаанбаатар хот, Сүхбаатар дүүргийн 7-р хороо
Ажлын цаг : Даваа - Баасан гариг, 8.30 - 17.30 цаг
Бямба, Ням амарна.
Утас : 1800-1890 /энгийн утасны тарифаар/
И-мэйл хаяг : contact@burtgel.gov.mn
Вэб сайт : http://burtgel.gov.mn

Хайлт