Монгол Улсаас БНСУ-д суугаа Элчин сайдын яамны Консулын хэлтэст ажиллалаа

Улсын бүртгэлийн ерөнхий газрын дарга Б.Баасандорж, Тамгын газрын дарга Г.Цолмон, Иргэний улсын бүртгэлийн газрын дарга Т.Нармандах, Мэдээллийн технологийн газрын дарга Д.Ган-Эрдэнэ нар өнөөдөр /2019.09.19/ Монгол Улсаас БНСУ-д суугаа Элчин сайдын яамны Консулын хэлтэст ажиллалаа.

Консулын хэлтсийн бүртгэлийн үйл ажиллагаатай танилцах үеэр тус хэлтэс нь энэ оны долоодугаар сард Элчин сайдын яамнаасаа тусдаа шинэ байранд нүүн орсон ба өдөрт 100 орчим иргэнд улсын бүртгэл, нотариат, итгэмжлэл зэрэг 20 гаруй үйлчилгээ үзүүлдэг, өнөөдрийн байдлаар 46 мянга гаруй Монгол Улсын иргэн оршин сууж байна гэж Монгол Улсаас БНСУ-д суугаа Элчин сайдын яамны Консулын хэлтсийн дарга, консул Л.Хаш-Эрдэнэ танилцуулсан юм. Тэрбээр, БНСУ-д Монгол Улсын иргэд олноор оршин суудаг учир иргэдэд үзүүлэх үйлчилгээг сайжруулах, Элчин сайдын яамны ачааллыг бууруулах зэрэг шалтгаанаар шинэ байрандаа нүүн дөрвөн хүний бүрэлдэхүүнтэй ажиллаж байна гэв.

Улсын бүртгэлийн ерөнхий газрын удирдах албан тушаалтнууд Консулын хэлтэст ажиллах үеэр тулгамдаж буй асуудлуудыг шийдвэрлэхэд зөвлөмж, чиглэл өгөхийн сацуу хурууны хээ уншигч төхөөрөмж болон тус улсад амьдарч буй Монгол Улсын иргэний бүртгэл хөтлөх компьютерийг шинэчилж өгсөн юм.

Ийнхүү улсын бүртгэлийн байгууллагын ажилтнуудын БНСУ-д хийсэн албан томилолт амжилттай өндөрлөлөө хэмээн Сөүл хотоос мэдээлэв.

ХАРИЛЦАХ

Засгийн газрын хэрэгжүүлэгч агентлаг - Улсын бүртгэлийн ерөнхий газар 14171 Улаанбаатар хот, Сүхбаатар дүүргийн 7-р хороо
Ажлын цаг : Даваа - Баасан гариг, 8.30 - 17.30 цаг
Бямба, Ням амарна.
Утас : 1800-1890 /энгийн утасны тарифаар/
И-мэйл хаяг : contact@burtgel.gov.mn
Вэб сайт : http://burtgel.gov.mn

Хайлт