Ким Хюнг Баэ: УБЕГ-тай хамтран ажиллах эрмэлзэл төрлөө

Бүгд Найрамдах Солонгос Улсад албан томилолтоор ажиллаж буй Улсын бүртгэлийн ерөнхий газрын дарга тэргүүтэй төлөөлөгчид өчигдөр /2019.09.18/ Сөүл хотод ажиллалаа.

Үдээс өмнө Сөүл хотын шүүхийн харьяа бүртгэлийн газрын үйл ажиллагаатай танилцав. Тус газар нь 2011 оны 09 дүгээр сараас үйл ажиллагаагаа эхлүүлсэн ба үл хөдлөх хөрөнгийн бүртгэл, үйлдвэрийн хөрөнгийн бүртгэл, уул уурхайн сангийн бүртгэл, гэр бүлийн эд хөрөнгийн гэрээний бүртгэл, хуулийн этгээдийн бүртгэл, хязгаарагдмал хариуцлагын итгэмжлэлийн бүртгэл, бизнесийн байгууллагын бүртгэл, усан онгоцны бүртгэл, хөрөнгийн болон хувьцааны барьцааны бүртгэлийг хийдэг юм байна.

Түүнчлэн Сөүл хотын Шүүхийн Тамгын газрын Гадаадад суугаа иргэдийн гэр бүлийн харилцааны бүртгэлийн газрыг байгуулах болсон шалтгаан нь гадаадад суугаа Солонгос иргэдийн тоо нь БНСУ-ын нийт хүн амын 5,2 хувьтай тэнцэж байна. Иймд иргэний оролцоотой шинэ дэвшил зорилтын хүрээнд тус газрыг байгуулан ажиллаж байгаа хэмээн холбогдох албаны хүмүүс тайлбарлаж байв.

Төлөөлөгчид үргэлжлүүлэн Дээд шүүхийн мэдээллийн удирдлагын төвийн үйл ажиллагаатай танилцав. Тус төв нь 2008 онд ашиглалтад орж, эдүгээ 145 төрийн албан хаагч, 700 гаруй гэрээт ажилтантайгаар үйл ажиллагаагаа явуулдаг ба мэдээллийн сангийн хэмжээ нь 101.15ТВ /терабайт/,  6,000 орчим тоног төхөөрөмж суурилуулагдсан, серверээ 6 жил тутамд 1 удаа шинэчилдэг төрийн чухал обьектод тооцогддог аж.

Тус төвийн захирал Ким Хюнг Баэ УБЕГ-ын удирдлагуудыг хүлээн авч уулзах үеэр хэлсэн үгэндээ, гадны төлөөлөгчид удаа дараа айлчилж байсан хэдий ч Монгол Улсын  УБЕГ шиг ийм өндөр хэмжээний төлөөлөгчид ирж байсан удаа үгүй. Монголоос хүрэлцэн ирсэн төлөөлөгчдийн бүрэлдэхүүнд Хууль зүй, дотоод хэргийн яамны төлөөлөл, УБЕГ-ын Тамгын газар, Мэдээллийн технологийн газар, мөн Иргэн, Хуулийн этгээд, Эд хөрөнгийн эрхийн улсын бүртгэлийн газрын дарга нар, Монгол Улсад Азийн хөгжлийн банкны санхүүжүүлэлтээр хэрэгжиж буй төслийн зохицуулагч багтсан байгаа нь бидний хувьд асар их хүндэтгэл, хариуцлага, цаашдын хамтын ажиллагааг өргөжүүлэх тэмүүлэл болон түлхэц болсон хэмээн онцолж байв. Тэрбээр, Улсын бүртгэлийн ерөнхий газар, БНСУ-ын Шүүхийн харьяа Төрийн албан хаагчдын сургалтын төвтэй Санамж бичиг байгуулсан талаар Солонгосын хэвлэл мэдээллээр харсан болохыг дурдаж, /https://m.lawtimes.co.kr/Content/Article?serial=155820/ Шүүхийн цахим мэдээллийн удирдлагын төв нь УБЕГ-тай хамтран ажиллах эрмэлзэл төрсөн гэдгээ нуугаагүй юм.

Харин УБЕГ-ын газрын дарга Б.Баасандорж хэлэхдээ, бидний айлчлалын зорилго бол БНСУ-ын цахим засаглалын хөгжил болон туршлагыг зүгээр үзээд өнгөрөх бус, энэ бүрэлдэхүүнд байгаа бүх албан тушаалтан энэхүү томилолтын хүрээнд хийсэн ажлаа Монголын бүртгэлийн байгууллагын хөрсөнд буулгаж болохуйц туршлагыг сайтар судалж илтгэх хуудсаар танилцуулах чиглэл өгсөн гэдгийг тодотгож байв.

Талууд харилцан сонирхсон сэдвээр яриа өрнүүлж, цаашдын хамтын ажиллагааг өргөжүүлэх боломж нээлттэй гэдэгт санал нэгтэй буйгаа илэрхийлж байв.

ХАРИЛЦАХ

Засгийн газрын хэрэгжүүлэгч агентлаг - Улсын бүртгэлийн ерөнхий газар 14171 Улаанбаатар хот, Сүхбаатар дүүргийн 7-р хороо
Ажлын цаг : Даваа - Баасан гариг, 8.30 - 17.30 цаг
Бямба, Ням амарна.
Утас : 1800-1890 /энгийн утасны тарифаар/
И-мэйл хаяг : contact@burtgel.gov.mn
Вэб сайт : http://burtgel.gov.mn

Хайлт