Эдийн засгийн ил тод байдлыг дэмжих тухай хууль 2015 оны 8 дугаар сарын 7-ны өдөр батлагдсан бөгөөд хувь хүн, хуулийн этгээд нь  2015 оны 4 дүгээр сарын 1-ний өдрөөс өмнөх хугацаанд нуун дарагдуулсан хөрөнгө, орлого, үйл ажиллагааг 2015 оны 12 дугаар сарын 31-ний өдрийн дотор сайн дурын үндсэн дээр ил болгосон тохиолдолд хуулиар тогтоосон хариуцлагаас нэг удаа чөлөөлөгдөх юм. Хариуцлагаас чөлөөлөгдөх хуулиуд нь

•           Нийгмийн даатгалын тухай хууль;

•           Хуулийн этгээдийн улсын бүртгэлийн тухай хууль;

•           Нягтлан бодох бүртгэлийн тухай хууль;

•           Гаалийн тухай хууль;

•           Захиргааны хариуцлагын тухай хууль.

•           Татварын ерөнхий хууль;

•           Нэмэгдсэн өртгийн албан татварын тухай хууль

байх бөгөөд дараах татварын төрлүүд хамрагдах юм . Үүнд:

•           аж ахуйн нэгжийн орлогын албан татвар;

•           хувь хүний орлогын албан татвар;

•           үл хөдлөх эд хөрөнгийн албан татвар;

•           нэмэгдсэн өртгийн албан татвар;

•           онцгой албан татвар;

•           гаалийн албан татвар.

Уг хуулийн зорилго нь хөрөнгө, орлого, үйл ажиллагааг сайн дурын үндсэн дээр ил болгон мэдүүлсэн тохиолдолд тухайн этгээдийг хариуцлагаас нэг удаа чөлөөлж, татварын баазыг тэлэх, бүртгэлийг сайжруулах, сүүдрийн эдийн засгийг бууруулж, хөрөнгө оруулалтын урсгалыг сайжруулах, бизнес эрхлэгчдэд шударгаар үйл ажиллагааг явуулах боломж, эхлэлийг тавих юм.