Өмнөговь аймгийн Улсын бүртгэлийн хэлтэс энэ оны есдүгээр сарын 22-ны өдрөөс эд хөрөнгийн эрхийн бүртгэлийн цахим мэдээллийн сан /ePRS/-г нэвтрүүлж, цахимжуулах ажлыг эхлүүллээ.

Монголын Мянганы сорилтын сангийн “Хөрөнгийн эрхийн төсөл”-ийн санхүүжилтээр Нийслэлийн 9 дүүрэг, бүсийн тулгуур төв болох 8 аймагт эд хөрөнгийн эрхийн бүртгэлийн архивын цаасан суурьт баримтыг цахимжуулах төсөл амжилттай хэрэгжиж бүрэн дууссан бөгөөд төсөлд хамрагдаагүй 13 аймаг үлдээд байсан юм. Тэдгээрийн нэг Өмнөговь аймгийн бүртгэлийн хэлтэс байсан бол одоо УБЕГ болон аймаг, орон нутгийн хөрөнгө оруулалтын дэмжлэгтэйгээр Эд хөрөнгийн эрхийн бүртгэлийн архивын цаасан баримтыг цахимжуулах ажлыг ийнхүү эхлүүлээд байна. Тус аймгийн 16023 эд хөрөнгийн эрхийн бүртгэлийн архивын хувийн хэргийг цахимжуулснаар иргэд төрийн үйлчилгээг түргэн шуурхай авах боломж бүрдэх юм.