Хууль зүйн яамны харьяа агентлаг, байгууллагууд хамтран энэ сарын 7-ноос 14-ний өдрүүдэд “Хууль тогтоомж сурталчлах нэгдсэн арга хэмжээ”-г нийслэлийн зургаан дүүрэгт зохион байгуулна.
Агентлаг, байгууллагууд дээрх өдрүүдэд эрхлэх асуудлын хүрээний хууль тогтоомжийг иргэд олон нийтэд сурталчлах, эрх зүйн зөвлөгөө, мэдээлэл өгөхөөс гадна иргэдийн санал хүсэлтийг хүлээн авч шийдвэрлэнэ. Мөн үндсэн чиглэл тус бүрээр иргэдэд зарим төрлийн үйлчилгээг шуурхай үзүүлнэ.
Улсын бүртгэлийн ерөнхий газрын зүгээс иргэний цахим үнэмлэхээ хаяж, үрэгдүүлсэн нийслэлийн 6 дүүргийн иргэдийн хүсэлтийг харьяалал болон доорхи хуваарийн дагуу хүлээн авч, цахим үнэмлэхийг өдөрт нь хэвлэж олгохоос гадна гадаад паспортын хугацааны сунгалтыг хийж үйлчилнэ.
Зөвхөн цахим үнэмлэхээ хаяж, үрэгдүүлсэн иргэд харьяалах дүүргийнхээ дагуу болон арга хэмжээ болох газарт 11.00-14.00 цагийн хооронд өөрийн биеэр очиж захиалга өгөх боломжтой. Захиалга өгсөн иргэдийн цахим үнэмлэхийг тухайн өдөрт нь хэвлээд 16.00 цагаас олгож үйлчлэх юм.
Харин гадаад паспортын хугацааны захиалгыг мөн адил 11.00-14.00 цагийн хооронд хүлээн авч 16.00 цагт буцаан олголтыг хийнэ. Хэрэв та 14.00 цагаас хойш гадаад паспортаа сунгуулахаар захиалга өгсөн тохиолдолд маргааш өдрийн 15.00 цагаас УБЕГ-ын зуун айлд байрлах гадаад паспортын олголтноос хүлээн авах ёстойг анхаарна уу.
“Хууль тогтоомж сурталчлах нэгдсэн арга хэмжээ” /11.00 - 16.30 минутын хооронд/ доорхи газруудад зохион байгуулагдана. Үүнд:
- 2015.09.07- Баянзүрх дүүрэг Жуковын хөшөөний урд талбай
- 2015.09.08- Баянгол дүүрэг Өргөө кино театрын урд талбай
- 2015.09.09- Сонгинохайрхан дүүрэг Соёмбо кино театрын урд талбай
- 2015.09.10- Сүхбаатар дүүрэг Чингисийн талбай
- 2015.09.11- Чингэлтэй дүүрэг Тусгаар тогтнолын талбай
- 2015.09.14- Хан-Уул дүүрэг Соёлын төвийн байрны урд талбай
“Хууль тогтоомж сурталчлах нэгдсэн арга хэмжээ”-нд оролцох агентлаг, байгууллагууд:
- Цагдаагийн ерөнхий газар
- Шүүхийн шийдвэр гүйцэтгэх ерөнхий газар
- Хил хамгаалах ерөнхий газар
- Иргэний харьяалал, шилжилт хөдөлгөөний ерөнхий газар
- Улсын бүртгэлийн ерөнхий газар
- Архивын ерөнхий газар
- Тахарын ерөнхий газар
- Хууль сахиулахын их сургууль
- Хууль зүйн үндэсний хүрээлэн
- Шүүхийн шинжилгээний үндэсний хүрээлэн
- Хууль зүйн туслалцааны төв
