Улсын бүртгэлийн ерөнхий газар нь НҮБ-ын Ази, Номхон далайн орнуудын Иргэний бүртгэл, хүн амын үндсэн статистик үзүүлэлтийг сайжруулахад чиглэсэн нийт 20 орны 30 гишүүнтэй бүсийн удирдах зөвлөлд сонгогдон ажиллаж байгаа билээ.

Тэгвэл энэ хүрээнд Тайланд улсын Бангкок хотод долоодугаар сарын 28-наас 30-ны өдрүүдэд зохион байгуулагдсан бүсийн удирдах зөвлөлийн анхдугаар хуралд тус газрын төлөөлөгч амжилттай оролцоод ирлээ.

Энэхүү хурлаар Ази, Номхон далайн орны Иргэний бүртгэл, хүн амын үндсэн статистикийг хөгжүүлэх , бүсийн үйл ажиллагааг хэрэгжүүлэхэд бүсэд үзүүлэх дэмжлэгийн арга зам болон хэлбэр, бүсийн үйл ажиллагааг хэрэгжүүлэх удирдамжийн төсөл, иргэний бүртгэл, хүн амын статистикийг сайжруулахад дэмжлэг болох бусад хөгжүүлэлтийн арга хэрэгсэл болон судалгааны талаар санал солилцлоо. Мөн энэ үеэр бүсийн удирдах зөвлөлийн 2015-2019 оны үйл ажиллагааны хөтөлбөрийн төслийг хэлэлцэв. Түүнчлэн дээрх асуудлуудыг хэлэлцсэнээс гадна гишүүн улсууд өнгөрсөн хугацаанд иргэний бүртгэл, хүн амын үндсэн статистикийг сайжруулах чиглэлээр хийсэн болон цаашид хэрэгжүүлэх арга хэмжээний талаар дор бүрнээ танилцуулах илтгэл тавив. Монгол улсын хувьд 1951 оны нэгдүгээр сарын 1-ний өдрөөс хойш иргэний төрөлтийн бүртгэлийг хөтөлж эхэлсэн бөгөөд 64 жилийн хугацаанд иргэний бүртгэлтэй холбоотой олон хууль, дүрэм, журам хөтөлбөрүүдийг батлан амжилттай хэрэгжүүлэн тасралтгүй сайжруулан ажилласаар ирсэн. Үүний зэрэгцээ 2010 онд хэрэгжиж эхэлсэн иргэний шинэчилсэн бүртгэл, цахим үйлчилгээ болон ТҮЦ машинт үйлчилгээг нэвтрүүлж техник технологийн дэвшлийг үйл ажиллагаандаа нэвтрүүлэн ажиллаж байгаа тухайгаа хурлын үеэр танилцуулсан юм. Монгол Улсын иргэний бүртгэлийн үйл ажиллагаа нь Энэтхэг, Пакистан зэрэг Өмнөд Азийн улс оронтой харьцуулахад орчин үеийн чиг хандлага руу шилжиж байгаагаас гадна төрөлт, нас баралт зэрэг хүний эрхийг хангах үндсэн бүртгэлдээ цаг тухайд нь иргэдээ хамруулдаг түвшин өндөр байгаа нь ч хурлын үеэр ажиглагдаж байлаа.