Бүртгэлийн байгууллагын 75 жилийн ойг угтан зохион байгуулж буй нэрэмжит туг аялуулах арга хэмжээ Төв, Архангай аймгуудад үргэлжилж байна. Аяны хүрээнд эдгээр аймгууд ерөнхий газраас өгсөн удирдамж, чиглэлийн дагуу төлөвлөгөө батлан, тодорхой ажлуудыг үе шаттай зохион байгуулан ажиллаж байна.

Тодруулбал, Архангай аймгийн бүртгэлийн хэлтэс дээрх аяны хүрээнд эхний ээлжинд аймгийн хэмжээнд иргэний баримт бичиг, хаягийн зөрчил арилгах 14 хоногийн аян зарлаад зогсохгүй энэ хугацаанд иргэний цахим үнэмлэхийн торгуулийн хэмжээг 5000 төгрөг болгон бууруулсан аж. Мөн нутгийн Захиргааны төв талбайд бүртгэлийн үйлчилгээг нэг цэгээс хүргэх зорилгоор Нээлттэй хаалганы өдрийг зохион байгуулж, газар өмчлөх эрх, үл хөдлөх хөрөнгийн болон бусад төрлийн бүртгэлийн үйлчилгээний хураамжийг энгийн болгож иргэдэд гэрчилгээг өдөрт нь багтаан олгож, шуурхай үйлчилсэн байна. Тэгвэл Төв аймгийн бүртгэлийн хэлтэс хуулийн этгээдийн улсын бүртгэлийн тухай хуулийг иргэд, олон нийтэд сурталчлах зорилгоор цахим хуудас, мэдээллийн самбарт холбогдох журмуудыг байршуулах, аймгийн иргэний танхимтай хамтарч энэ чиглэлээр аймгийн удирдлагуудаас гадна иргэд, аж ахуй нэгжид мэдээлэл, зөвлөгөө өгч, гарын авлага тараажээ. Түүнээс гадна Батсүмбэр суманд “Нээлттэй хаалганы өдөр”-ийг зохион байгуулж, аймгийн радиогоор тус өдрийн арга хэмжээ болон аяны хүрээнд хийж буй ажлаа иргэдэд танилцуулан бусад шаардлагатай мэдээллийг өгчээ. Аяны хүрээнд аймгийн хэмжээнд бүртгэлтэй хуулийн этгээдийн зөрүүтэй тоон мэдээллийг цэгцлэх ажлыг зохион байгуулж эхлээд байгааг албаны хүн онцоллоо.