Хуулийн этгээдийн улсын бүртгэлийн тухай хууль шинээр батлагдсантай холбогдуулан хуулийн этгээдийн бүртгэлийн шинэчилсэн журамд оруулах санал авах хэлэлцүүлэг өнөөдөр боллоо.

Хэлэлцүүлгээр Хуулийн этгээдийн улсын бүртгэлийн тухай хуулийн нэр олгох, баталгаажуулах журам, Монгол Улс дахь гадаадын хуулийн этгээдийн төлөөлөгчийн газрыг улсын бүртгэлд бүртгэх журам, Хуулийн этгээдийг улсын бүртгэлд бүртгэх журам, Иргэн, хуулийн этгээдийн тамга, тэмдэг, баталгааны тэмдэг хийлгэх, үйл ажиллагаанд хяналт тавих, лавлагаа олгох зэрэг шинэчилсэн журамд төр, хувийн хэвшлийн байгууллагын төлөөллүүд болон холбогдох мэргэжлийн холбоодын албаны хүмүүс тусгах саналаа илэрхийлж, хэлэлцлээ. Хуулийн этгээдийн улсын бүртгэлийн тухай хууль хэрэгжиж эхэлснээр компани байгуулахдаа цахимаар бүртгүүлж, хуулийн этгээдийн бүртгэлийг илүү түргэн, шуурхай гүйцэтгэх хууль эрх зүйн орчин ийнхүү бүрдэж байгаа юм.