Хууль зүйн сайд, аймгийн Засаг даргын 2014 онд хамтран ажиллах гэрээнд тусгагдсан хүн ам олноор суурьшсан болон аймгийн төвөөс алслагдсан бүсийн төвүүдэд эд хөрөнгийн эрхийн улсын бүртгэлийн бүртгэлийн нэгжийг бий болгох, улсын бүртгэлийн үйлчилгээний шат дамжлагыг бууруулах, иргэдэд үйлчилгээг түргэн шуурхай хүргэх зорилтын хүрээнд Сэлэнгэ аймгийн Улсын бүртгэлийн хэлтэс нь аймгийн Мандал, Сайхан сумдад бүсчилсэн хэлбэрээр эд хөрөнгийн бүртгэлийн үйлчилгээг бий болгох ажлыг амжилттай зохион байгуулсан билээ.

Тэгвэл энэ сарын 24, 25-ны өдрүүдэд энэхүү эд хөрөнгийн цахим бүртгэлийг орон нутагт нэвтрүүлэх нээлтийн арга хэмжээ дээрх сумдад боллоо. Уг арга хэмжээг нээж Улсын бүртгэлийн ерөнхий газрын тэргүүн дэд дарга Т.Баттулга, аймгийн Засаг дарга С.Бүрэнбат нар үг хэлэв. Эд хөрөнгийн эрхийн бүртгэлийн архивыг цахимжуулснаар Сэлэнгэ аймгийн Мандал, Сайхан сумдын иргэд өмнө нь 170-260 кило метр явж аймгийн төвөөс эд хөрөнгийн эрхийн бүртгэлийн үйлчилгээг авдаг байсан бол одоо илүү ойроос түргэн шуурхай үйлчилгээ аваад зогсохгүй онлайнаар бүртгэл хийлгэх боломжтой боллоо. Энэ нь төрийн үйлчилгээ тэр дундаа улсын бүртгэлийн үйлчилгээ иргэдэд улам ойртож байгаагаас гадна тэдний цаг зав, эдийн засгийг хэмнэсэн томоохон дэвшилттэй ажил болж байгаа юм. Тодруулбал, тус сумын иргэд анхан шатны нэгж болох сумаас эд хөрөнгийн эрхийн бүртгэлийн үйлчилгээг ийнхүү илүү ойроос түргэн шуурхай авч эхэллээ. Эд хөрөнгийн эрхийн архивыг цахимжуулах ажлын хүрээнд Мандал, Сайхан бүсүүдэд хамаарах эрхийн улсын бүртгэлийн хувийн хэргийг цахимжуулах ажлыг Улсын бүртгэлийн ерөнхий газрын ажлын хэсэг болон тус хэлтсийн эд хөрөнгийн эрхийн бүртгэлийн тасаг, бүртгэлийн хяналтын нэгжтэй хамтран нийт 13028 ширхэг хувийн хэрэг буюу нийт архивын сан хөмрөгийн 46,1 хувийг цахимжуулсан юм. Нээлтийн арга хэмжээнд Эд хөрөнгийн эрхийн бүртгэлийн газрын дарга Н.Туяа, Аймгийн засаг даргын орлогч Н.Батдорж, Мандал сумын Засаг дарга Н.Нямдаваа, Иргэдийн хурлын дарга И.Эрдэнэхүү, Сэлэнгэ аймгийн Улсын бүртгэлийн хэлтсийн дарга Х.Батгэрэл болон бусад албаны хүмүүс оролцсоноос гадна Сайхан сумын Засаг дарга С.Энхтайван, Баруун бүсийн таван сумын Засаг дарга нар болон хамтран ажилладаг байгууллагуудын удирдлага болон иргэдийн төлөөлөл оролцов.