Улсын бүртгэлийн байгууллагын ажилтан, албан хаагчид та бүхэндээ бүртгэлийн ажилтны баярын өдрийн халуун мэндийг хүргэе. Жил бүрийн 11 дүгээр сарын 23-ны өдөр тохиодог Улсын бүртгэлийн ажилтны өдөртэй энэ удаа Монгол бахархлын өдөр давхцаж байгааг ихэд билэгшээж байна.
Улсын бүртгэлийн алба нэгдсэн нэг бүртгэлийн тогтолцоонд шилжиж бүртгэлийн албаны үсрэнгүй шинэчлэлийн эхлэл тавигдсан өнгөрсөн 5 жилийн хугацаанд бүртгэлийн албаны хамт олон бид Монгол Улсад бүртгэлийн нэгдсэн тогтолцоог бэхжүүлэх, бүртгэлийг төгөлдөршүүлэх, бүртгэлийн үнэн зөв, тунгалаг үйлчилгээгээр иргэний эрхийг баталгаажуулах, төрийн үйлчилгээний дэвшилтэт шинэ орчныг бүрдүүлэх хүрээнд олон зорилтот ажлуудыг төлөвлөн зохион байгуулсан нь үр дүнгээ өгч байна. Төрийн үйлчилгээг иргэнд ойртуулах, үйлчилгээнд чанар, дэвшлийг авчрах ажлын гол менежмент нь Засгийн газрын “Цахим засаглал” үндэсний хөтөлбөрийн хэрэгжилтийг хангаж, бүртгэлийн албаны үйлчилгээг цахимжуулах, орчин үеийн мэдээллийн технологийн дэвшлийг үйл ажиллагаандаа өргөнөөр нэвтрүүлэх явдал юм. Иймдээ ч цаасан суурьт архивын эх нотлох баримтыг цахимжуулах замаар үйлчилгээг хялбаршуулах, автоматжуулах төсөл, хөтөлбөрийг өөрсдийн дотоод нөөц бололцоо болон гадаад, дотоодын байгууллагуудтай хамтран хэрэгжүүлж ирсний дүнд хуулийн этгээдийн бүртгэлийн цаасан баримтыг улсын хэмжээнд бүрэн цахимжуулсан, Нийслэл болон нэр бүхий 8 аймагт эд хөрөнгийн эрхийн бүртгэлийн цахим үйлчилгээ нэвтэрсэн, архивын лавлагаа мэдээллийн үйлчилгээнд цахимжсан мэдээллийн санг ашиглаж эхэлсэн зэрэг бодит ажлын үр дүнг дурьдаж болно. Түүнчлэн төрийн үйлчилгээг иргэдэд ойртуулах, анхан шатны нэгжээс үзүүлэх үйлчилгээний төрөл тоог нэмэгдүүлэх, үйлчилгээний шат дамжлагыг цөөрүүлэх, бүртгэлд зарцуулах хугацааг багасгах чиглэлээр хэрэгжүүлсэн ажлууд нь төрийн шинэлэг оновчтой үйлчилгээ болсныг иргэдийн зүгээс онцолж, талархан хүлээн авч байна. Нөгөө талаас бүртгэлийн алба нь төрийн өмнөөс гагцхүү иргэний, эд хөрөнгийн эрхийн, хуулийн этгээдийн бүртгэлийн үйлчилгээг үзүүлэгч байгууллага бус, эдийн засаг нийгмийн хөгжлийн бодлогын баримт бичгийг оновчтой тодорхойлоход шаардлагатай судалгааны тоон мэдээллээр хангагч, мөн иргэдийн оролцоо, шууд ардчилалын зарчимд суурилсан төрийн шударга сонгуулийг явуулахад оролцогч, нэгдсэн нэг бүртгэлд суурилсан, төвлөрсөн цахим мэдээллийн сангаар дамжуулан төрийн ой санамж болсон суурь мэдээллийг төрийн бусад үйлчилгээнд түгээгч байгууллага болжээ. Цаашид үнэн зөв, цахим нэг мэдээллийн сантай болсон, цаасан баримт цахимжсан зэргээс улбаалан төрийн үйлчилгээнд 100% цахим бүртгэлийн үйлчилгээг үзүүлж эхлэх боломж харагддаг. Үүний тулд бүртгэлийн харилцаанд мөрдөгдөж буй хууль эрх зүйн орчны шинэчлэл зайлшгүй юм. Улсын бүртгэлийн шинэчлэлийн ажлуудыг үе шаттайгаар зохион байгуулж, дэлхийн чиг хандлагад нийцсэн орчин үеийн бүртгэлийн алба болон бэхжих ажил үйлсийн амжилт бүхэн нь бүртгэлийн байгууллагад ажиллаж байсан ахмадууд, Монгол улсын өнцөг булан бүрт ажиллаж байгаа ажилтан албан хаагчид, улсын бүртгэгч нарын маань нөр их хөдөлмөрийн үр дүн, хичээл зүтгэл, сэтгэл байсныг онцлон тэмдэглэх нь зүйтэй юм.
Үнэн зөв бүртгэлийн үйлс бүхэн дэлгэрэх болтугай
