Хууль зүйн яамны сайдын 2014 оны 10 сарын 31-ний өдрийн 4/4038 тоот “Эбола” вирус болон бусад шинээр бүртгэгдэж байгаа халдварын болзошгүй аюулаас урьдчилан сэргийлэх, бэлэн байдлыг хангах тухай “ болон Үндэсний аюулгүй байдлын зөвлөлийн” 2014 оны 09 дүгээр сарын 01-ний өдрийн 45/25 дугаар зөвлөмжийн дагуу тус газар Халдварт судлалын үндэсний төвтэй хамтран “Эбола вирусээс урьдчилан сэргийлэх” сэдэвт сургалтыг зохион байгуулж холбогдох ажилчид, албан хаагч нарыг хамрууллаа.

Дэлхий нийтэд тулгараад байгаа энэ аюулаас яаж урьдчилан сэргийлэх тал дээр сургалтын гол агууллагыг хандуулан явуулсан бөгөөд Эбола вирусын шинж тэмдэг нь хэрхэн илрэх, ямар замаар халдварлах, хэрхэн урьдчилан сэргийлэх талаар танилцууллаа. Мөн эдгээр шинж тэмдгүүд илэрсэн хүнээс болгоомжлох, гарын ариун цэврийг байнга сахих, онцын шаардлагагүй тохиолдолд Эболагийн эрсдэлтэй бүс нутагруу зорчихгүй байх талаар тодорхой хэмжээний мэдлэг олгохоос гадна хувийн зүгээс авч болох энгийн аргуудыг амьдрал дээр хэрэгжүүлэн эрсдэлээс сэргийлэх боломж байгаа гэдгийг онцгойлон ойлгууллаа. Эбола вирус нь зүй тогтлынхоо хувьд амьтнаас хүнд дамжин халдварласан бөгөөд одоогоор хүнээс хүнд дамжин халдварласаар байгаа юм байна. Вирусын халдварын нууц үеийн хугацаа нь 2-21 хоног, шууд хавьтлаар дамжина, биологийн бүх шингэнээр халдварлагддаг байна. Халдвар авсан хүмүүсийн шинж тэмдгүүд нь: цус алдах, халуурах, бөөлжих, булчин үе мөч өвдөх, арьсан дээр тууралт гарах, суулгах зэргээр илэрдэг байна. Уг вирус нь анх 1976 онд Африк тивээс гаралтай бөгөөд Эбола голын ойролцоо анх халдварын шинж тэмдэг бүртгэгдсэнээс үүдэлтэй энэ голын нэрээр нэрлэсэн аж. Өнөөг хүртэл 20 гаруй дэгдэлт бүртгэгдсэн ба энэ удаагийнх хамгийн том дэгдэлт гэж үзэж байгаа юм. Учир нь олон хүнийг хамарсан, нас баралт өндөр, аялал жуулчлал, худалдаа, наймаанд асар их гарз хохирол учирч 800 мянган америк долларыг зарцуулаад байгаа аж.