“Иргэдийн оролцоо ба шилдэг агентлаг тодруулах аян”-ы хүрээнд УБЕГ-ын дарга Ц.Пүрэвдоржтой ярилцлаа.
-Олон нийтийн хувьд хамгийн их хүнд сурталтай төрийн байгууллагын тухай асуухад танайхыг нэрлэдэг байсан. Одоо цахимжаад, аливаа лавлагааг ТҮЦ машинаас аваад эхлэхээр ачаалал буураад хэл амны бай болох нь багассан уу?
-УБЕГ 2010 онд иргэний шинэчилсэн бүртгэлийг эхлүүлсэн. Мэдээж иргэн бүрийг энэ бүртгэлд хамруулах, үнэн зөв мэдээлэл оруулах, лавлагаа өгөх гэх зэрэг олон ажил ундарч, ачаалал нэмэгдсэн. Харин өнөөдрийн байдлаар шинэчилсэн бүртгэлийн ажил ерөнхийдөө дууссантай холбоотойгоор иргэний бүртгэлийн ажил жигдэрсэн.
Түүнчлэн үнэн, зөв бодитой мэдээллийн санг үүсгэж чадсан. Энэхүү санг ашиглан иргэний бүртгэлтэй холбоотой бүх төрлийн лавлагаа, мэдээллийг өгч байгаа бөгөөд ачаалал эрс буурсан.
Зөвхөн 100 айлд ч бус аймаг, дүүргүүдэд ч ачаалал багатай болсон.
-Иргэний бүртгэлээс гадна УБЕГ эд хөрөнгийн эрхийн бүртгэл болон түүнтэй холбоотой мэдээллийг иргэд, холбогдох байгууллагуудад өгдөг. Ипотекийн зээлтэй холбоотойгоор мөн л ачаалал ихдэх, чирэгдэлтэй байна гэх зэрэг гомдлууд гарсаар байгаа шүү дээ?
-Эд хөрөнгийн бүртгэлийн хувьд өнгөрсөн жил маш олон ажил давхцсан. Тухайлбал Монголын мянганы сорилтын сантай хамтран 2012 оноос эхлэн төсөл хэрэгжүүлсэн. Мөн цахимжуулах, шинэ систем нэвтрүүлэх, Засгийн газраас ипотекийн зээлийн журам гарсантай хоолбоотойгоор манайхаас лавлагаа, мэдээлэл авах зэргээр ачаалал 5-6 дахин нэмэгдсэн.
Энэ тохиолдолд иргэдэд аль болох түргэн шуурхай үйлчлэх үүднээс ажлаа шахсаар намар буюу өнгөрсөн 10 дугаар сараас эхлэн хэвийн байдалд оруулж чадсан. Одоо бол багассан. Хуулийн этгээдийн бүртгэлийн хувьд аймгууд болон 100 айл дахь байрандаа үйлчилгээ үзүүлж байгаа. Ерөнхийдөө хамгийн том ажил маань мэдээлэл, лавлагаа өгөх. Сүүлийн үед цахимжиж эхэлснээр ачаалал буурч хаа, хаанаа бухимдал чирэгдэлгүй болох нөхцөл бүрдсэн.
-Шинэчилсэн бүртгэл жигдэрсэн гэхээр өмнө нь иргэдэд тохиолддог байсан, овог нэр, регистрийн үсэг, тоо зөрөх гэх мэт архивын алдаа гарахгүй гэж ойлгож болох уу?
-Иргэний бүртгэлийн байгууллага үүсч хөгжсөн 74 жилийн түүхтэй. Өмнө нь иргэний бүртгэлийн үйл ажиллагаа урсгалаараа хийгдэж ирснээс зөрчил ихтэй, мэдээллийн санд эргэлзээтэй бүртгүүлсэн тохиолдол байдаг байсан. Харин шинэчилсэн бүртгэл хийгдсэнээр эдгээрийг бүгдийг нь үнэн зөв бодитой болгож, цэгцэлсэн.
Тэр ч утгаараа 2012, 2013 онд шат шатны сонгуульд иргэний бүртгэлийн санг ашиглан сонгогчдын нэрсийн жагсаалтыг гаргасан. 3200 гаруй хэсгийн хороон дээр сонгогчдын нэрийн жагсаалтыг тоног төхөөрөмжид суулган хүргүүлсэн. Иргэд сонгуулийн санал өгөх үедээ анзаарсан байх. Хурууны хээгээ уншуулахад л фото зургийн сангаас болон иргэний бүх мэдээлэл нь гарч ирж байсан шүү дээ. Өөрөөр хэлбэл хэдхэн минут, секундын хугацаанд сонгогчдын нэрсийн жагсаалтыг бий болгож чадсан. Мэдээж Дорж хурууны хээгээ уншуулахад Дулмаагийн зураг гараад ирвэл аюул болно. Гэхдээ манай хамт олон ийм алдаагүйгээр маш сайн ажиллаж чадсан.
-Мэдээллийн санг өөрөөр хэрхэн ашиглаж байгаа вэ?
-Мэдээж өөрийн байгууллагын чиг үүргийн дагуу мэдээллээр хангаж байна. Цаашид дундын өгөгдлийн сан болгоод төрийн бусад байгууллагын хэрэглээнд нэвтрүүлэх боломжийг бүрдүүлсэн. Өөрөөр хэлбэл, нийгмийн халамж, даатгал гэх зэргээр өөрсдийн орох түвшнээс мэдээллээ авна гэсэн үг. Одоогоор хилийн боомтууд, татварын байгууллага тодорхой түвшинд авч байгаа. Дараагийн шатанд нарийвчлан ашиглах боломжтой болгоно.
-Олон байгууллага нарийвчлан ашиглаад эхлэхээр хувь хүний нууц алдагдах тохиолдол гарах юм биш биз?
-Иргэний бүртгэлийн мэдээллийн сан маш нууцын зэрэглэлтэй. Мөн хууль хяналтын байгууллагууд хяналт тавьж ажилладаг. Аливаа төрийн байгууллагыг зөвхөн өөрсдийнх нь түвшинд орж ажиллах боломжоор хангадаг учраас мэдээлэл алдагдах боломжгүй.
-Бүх зүйл автомат, цахим хэлбэрт орчихвол ажилтнуудаа цомхотгох уу?
-Бид маш олон ажил хэрэгжүүлж байгаа. Ямартай ч 2014, 2015 ондоо дотоод ажлаа цэгцэлж, цахимжуулахаар шуурхайлж байна. Тиймээс одоогоор хүнээ халж, цомхотгох асуудал хөндөгдөөгүй. Одоогийн бүрэлдэхүүн маань хэвээр ажиллана.
-Иргэний цахим үнэмлэхийг хэзээнээс яг цахим хэлбэрээр нь ашиглаж эхлэх вэ?
-PKI буюу цахим гарын үсэг суулгах ажил ойрын үед хийгдэнэ. Мэдээлэл, технологи шуудан харилцааны газар программыг чипэнд суулгахад бэлэн болгосон. Дөрөвдүгээр сарын сүүлч гэхэд ТҮЦ машинаар дамжигдан хийгдэх юм. Ингэснээр цахим үнэмлэхийг 100 хувь ашиглах боломж бүрдэнэ. Чипэнд хурууны хээг уншуулж ашиглаж байгаа шиг цусны бүлэг, сонгууль өгсөн тойрог, хэсэг, нийгмийн халамж, даатгалын тогтолцооны мэдээлэл зэргийг суулгаж ашиглах боломжтой.
-Өөр ямар үйлчилгээг цахимжуулах юм бол гэсэн хүлээлт иргэдэд байдаг. Энэ ч замын түгжрэлээс эхлээд цаг хугацаа хэмнэж байгаа болохоор амар байх шиг байгаа юм. Ер нь танай байгууллагын нэн тэргүүний зорилтоос сонирхвол?
-Хамгийн түрүүнд иргэний цахим үнэмлэхийн захиалгыг ТҮЦ машин болон интернэт орчинд авдаг болохоор зорьж, ажиллаж байна. Ингэснээр тухайн хүн заавал дүүрэг, 100 айл руу очихгүйгээр өөрт ойр ТҮЦ машинаас захиалга өгч иргэний үнэмлэхээ дахин авах боломжтой болно.
Түүнчлэн нийслэлийн Засаг дарга бөгөөд Улаанбаатар хотын захирагч Э.Бат-Үүлтэй хамтран ажиллах санамж бичигт гарын үсэг зурсан. Энэ хүрээнд бүртгэл мэдээллийн үйлчилгээг нийслэлийн иргэд өөрийн хорооноос авах боломжийг бүрдүүлэхээр ажиллаж байна. Энэ онд эрх зүйн шинэтгэл хийх бүртгэлийн тухай үндсэн гурван хуулиа шинэчлэхээр зорьж байгаа. Эдгээр хуулиуд батлагдаад, мөрдөж эхлэхээр дагаж мөрдөж буй бүх журмыг шинэчилнэ.
Тиймээс 2014 он бүртгэлийн системийн хувьд эрх зүйн шинэчлэлийн жил байх болно.
-Гадаад буюу Е серийн паспортын торгуулийг тухайн байцаагч үзэмжээрээ шийддэг хэмээн иргэд гомдоллодог?
-Захиргааны хариуцлагын тухай хуульд заасны дагуу хяналтын улсын байцаагчид торгууль ногдуулдаг. Торгуулийн хэмжээг тухайн паспортыг ашигласан хугацаа зэргээс шалтгаалан тогтоодог.
-УБЕГ олон нийтэд хэр нээлттэй байгууллага вэ?
-Вэб сайтаараа дамжуулан хүний нөөцийн бодлого, санхүүгийн байдал, худалдан авах ажиллагааны мэдээлэл, иргэдэд үзүүлж буй бүх үйлчилгээний талаар дэлгэрэнгүй мэдээлж байгаа. Тухайн жилийнхээ үйл ажиллагааны тайланг хэвлэл мэдээллийн байгууллагаар дамжуулан танилцуулж байна.
-Танай байгууллагын тухайд үйл ажиллагааны чиглэлийн дагуу шинэ санал санаачилга, арга технологийг өдөр тутмын ажиллагаандаа тусган хэрэгжүүлж байгаа нь ил байна. Гэхдээ хэдий цахимжиж байгаа ч хүн ажиллах нь гарцаагүй. Тэр утгаараа хүнд суртал хэр байгаа бол?
-Бид цахимжуулалт, автоматжуулалтыг ашиглаж байгаа нь шат дамжлагыг багасган хүмүүсийн цаг хугацааг хэмнэж, хүнд суртлыг багасгахын төлөө ажилласаар ирсэн. Манай байгууллагын тухайд ихэнхдээ техниктэй харилцаж мэдээлэл, лавлагаа авч байгаа болохоор хүнд суртлыг үгүй хийхийн төлөө ажиллаж байна.
Орон нутгийн бүртгэлийн газрууд маань л гэхэд үйлчлүүлэгчээ угтан авч, зөвлөгөө өгдөг шинэ үйлчилгээ нэвтрүүлж эхэлсэн.
-Төрийн байгууллагын ажилтан, албан хаагчдыг авлига, ашиг сонирхлын зөрчилтэй гэх зэргээр чичлэдэг. Танай байгууллагын хувьд авлигаас ангид байж, ажилтнууд чинь ашиг сонирхлын зөрчилгүйгээр үүргээ гүйцэтгэж чаддаг уу?
-Өнгөрсөн онд аль байгууллага авлигатай тэмцэж чадаж байгаа болон ил тод ажилладаг эсэхийг судалж, авлигын индексийг жагсаасан. Тэгэхэд хамгийн өндөр буюу 74.5 оноо авч, сүүлийн хоёр жилийн хугацаанд авлигатай маш сайн тэмцсэн гэж ойлгож байгаа. Ашиг сонирхлын зөрчлийн тухайд хуулийн дагуу ажил үүргээ биелүүлэн ажилладаг.
Ж.НАРАНГЭРЭЛ
Эх сурвалж: "ӨГЛӨӨНИЙ" сонин