Шинэчлэлийн Засгийн газраас хэрэгжүүлж буй төрийн үйлчилгээний шинэтгэлд өндөр үүрэг оролцоотой ажиллаж байгаа агентлаг бол Улсын бүртгэлийн ерөнхий газар. Ачаалал өндөртэй, чирэгдэл ихтэйгээрээ ямагт шүүмжлүүлж ирсэн энэ байгууллагын ажилд ямар шинэчлэл хийгдэж, үйлчилгээ нь хэрхэн хөнгөн шуурхай болж байгааг ээлжит "Бүтээн байгуулалтын цаг"-аар танилцууллаа.

Тус газраас олгодог бүртгэл, лавлагааны бүх баримт бичгийг ТҮЦ машинтай холбосноор иргэд заавал биечлэн ирж үйлчилгээ авах шаардлагагүй болсон юм. Өнгөрсөн хугацаанд 160 мянга гаруй иргэн ТҮЦ машинаар дамжуулан иргэний болон үл хөдлөх эд хөрөнгийн бүртгэлийн лавлавааг мэдээллийн үйлчилгээг авсан нь тус байгууллагын ачааллыг ихээр хөнгөвчилж, иргэнд шат дамжлагагүй хөнгөн шуурхай үйлчилгээ хүргэж чаджээ. Бүртгэлийн үйлчилгээг цахимжуулах ажил цаашид ч үргэлжилнэ. Өнөөдрөөс хуулийн этгээдийн бүртгэлийн лавлагааг ТҮЦ машинаар олгож эхэлж байгаа ба ингэснээр өмнө нь гурав хоногт гардаг байсан үйлчилгээ ердөө 3 минутад багтах ажээ. Хаясан, гээсэн цахим үнэмлэхээ ТҮЦ машин, интернэтээр захиалдаг үйлчилгээг ойрын хугацаанд нэвтрүүлэхээр төлөвлөж байгаа. Энэ ондоо багтааж бүртгэлийн анхан шатны нэгж болох хорооноос, эхний ээлжинд нийслэлийн 42 хорооноос улсын бүртгэлийн 16 төрлийн үйлчилгээ үзүүлж эхэлнэ. Бичиг баримтыг иргэний захиалгын дагуу гараас гарт, гэрт нь хүргэх үйлчилгээг нэвтрүүлсэн. Одоогоор гадаад паспортыг баталгаат шуудангаар дамжуулан хаягаар хүргэж байгаа бол цаашид үл хөдлөхийн гэрчилгээ, хуулийн этгээдийн гэрчилгээ, цахим үнэмлэх зэрэг бүртгэлийн байгууллагаас иргэнд олгодог бичиг баримтыг иргэний хүсэлтээр хаягаар нь хүргэх үйлчилгээг өргөжүүлэн зохион байгуулна гэж УБЕГ-ын удирдлагууд онцоллоо. Төрсний болон гэрлэлтийн гэрчилгээнд кирилл, монгол бичгээр зэрэгцүүлсэн бичилт хийдэг болсон нь тус байгууллагын хэрэгжүүлсэн бас нэг шинэ ажил. Энэ ажлын хүрээнд 161752 нэр бүхий уйгаржин бичгийн толь үүсгэсэн байна. “Энэ мэтчилэнгээр үйлчилгээгээ цахимжуулахад өнгөрсөн онуудад анхаарлаа. Харин энэ онд эрх зүйн дорвитой шинэтгэл хийнэ. Иргэний бүртгэлийн тухай хууль, Эд хөрөнгийн болон хуулийн этгээдийн бүртгэлийн хууль тогтоомжуудын шинэчилсэн найруулгын төслийг УИХ-аар хэлэлцүүлнэ. Бүртгэлийн үйлчилгээ цахим байх, бүртгэл хийлгэхэд иргэнээс шаарддаг бичиг баримтын тоог цөөлж үйлчилгээний шат дамжлага, цаг хугацааг багасгах, бүртгэлийн үйлчилгээнд төрийн бус байгууллагын оролцоог нэмэхэд эрх зүйн шинэчлэлийн гол зарчим чиглэсэн” гэж УБЕГ-ын дарга Ц.Пүрэвдорж хэллээ.