УИХ-ын гишүүн Ж.Батзандангаар ахлуулсан ажлын хэсэг Хуулийн этгээдийн бүртгэлийн тухай хуулийн шинэчилсэн найруулгын төслийг боловсруулсан талаараа өнөөдөр сэтгүүлчдэд мэдээлэл хийлээ.

Хууль зүйн байнгын хорооны 2014 оны дөрөвдүгээр сарын тогтоолоор байгуулагдсан энэхүү ажлын хэсгээс Улсын бүртгэлийн тухай хуулийн шинэчилсэн найруулгын төслийг УИХ-д өргөн барихаар болсон бөгөөд төслийг ирэх долоо хоногт УИХ-аар хэлэлцүүлэхээр төлөвлөөд байна. Хуулийн шинэчилсэн найруулгад бүртгэлийн үйлчилгээг түргэн шуурхай болгох зорилгоор хуулийн этгээдийг бүртгүүлэхэд ажлын таван өдөр зарцуулдаг байсныг 24 цаг болгосон, хуулийн этгээдийн бүртгэлтэй холбоотой асуудлаар Хуулийн этгээдийн бүртгэлийн газар болон бусад байгууллагад биеэр удаа дараа очдог байсныг нэг удаа очдог болгох зарчмын өөрчлөлтийг оруулжээ. Мөн хуулийн этгээд салбарын яамд,агентлагт бүртгүүлдэг байсныг Хуулийн этгээдийн бүртгэлийн газарт төвлөрүүлснээр бизнес эрхэлэгчдийн хувьд ойлгомжгүй байдал, давхардлыг арилгана гэж үзэж байгаа юм байна. Мөн хуулийн этгээдийн бүртгэлийн гэрчилгээг үнэт цаасан дээр хэвлэдэг өнөөгийн байдлыг халж, цахим хэлбэрт шилжүүлэн гэрчилгээг хаяж үрэгдүүлсэн тохиолдолд өөрийн онлайн данснаас шууд хэвлэх боломжтой хувилбарт шилжүүлж байгааг ажлын хэсгээс онцоллоо. Хуулийн этгээдийн улсын бүртгэлийн тухай хууль батлагдсанаар мэдээллийн ил тод байдал бий болж, төрийн үйлчилгээ цахим хэлбэрт шилжин иргэд, аж ахуйн нэгжид түргэн шуурхай, хүндрэлгүй үйлчилдэг болох юм.