Өнгөрсөн оны үйл ажиллагааны үр дүнгийн гэрээ, төлөвлөгөөний биелэлт, ажлын ололт амжилтаа бататган дүгнэн, анхаарах шаардлагатай асуудлаа хэлэлцэж цаашид хийж, хэрэгжүүлэх ажлаа ярилцдаг уламжлалтай Улсын бүртгэлийн байгууллагын төв, орон нутгийн удирдах ажилтны нэгдсэн сургалт, зөвлөгөөн амжилттай болж өндөрлөлөө.

Тус зөвлөгөөнийг нээж Улсын бүртгэлийн ерөнхий газрын дарга Ц.Пүрэвдорж үг хэлсэн. Тэрээр улсын бүртгэлийн байгууллагын зорилго, зорилтын хүрээнд энэ онд авч хэрэгжүүлэхээр төлөвлөөд байгаа зарим шаардлагатай ажил, арга хэмжээний талаар товч мэдээлэл өгч, ирэх онд хүн бүр төрийн албан хаагчийн хуулиар хүлээсэн үүргээ хариуцлагатай нэр төртэй биелүүлж, төрийн үйлчилгээг иргэддэд эрх тэгш, шуурхай, хүртээмжтэй хүргэх эрхэм зорилгоо бататгах, төрийн албан хаагчийн ёс зүйг эрхэмлэн сахиж, ажиллахыг үүрэг болголоо. Зөвлөгөөний эхний өдөр Хууль зүйн яам, Төрийн албаны салбар зөвлөл, Авлигатай тэмцэх газраас төрийн албаны болон төрийн албан хаагчдын ёс зүй, соёл, түүний хэм хэмжээг төлөвшүүлэх арга зүй, зөрчлийн менежмент, авлига, ашиг сонирхлын зөрчлөөс урьдчилан сэргийлэх зэрэг сэдвийн хүрээнд дээр байгууллагуудын холбогдох албан тушаалтан, сургагч багш оролцож шаардлагатай мэдээлэл хийхээс гадна Улсын бүртгэлийн байгууллагын үйл ажиллагаатай холбогдуулан тус яамнаас чиглэл өглөө. Мөн энэ үеэр Шинэчлэлийн Засгийн газраас баримтлах бодлого, “Том төрөөс ухаалаг төр лүү” хөтөлбөрийн хүрээнд хийж хэрэгжүүлэхээр төлөвлөсөн ажлаа болон “Төрийн үйлчилгээнд бүртгэлийн байгууллагын үүрэг оролцоо” сэдвийн хүрээнд Улсын бүртгэлийн ерөнхий газрын холбогдох удирдлагууд илтгэл тавьж, танилцуулга хийлээ. Түүнчлэн уламжлал ёсоор улсын бүртгэлийн үйл ажиллагаанд гарч буй зөрчил, алдаа дутагдал, шийдвэрлэхэд хүндрэлтэй асуудлууд, 2014 оны бүртгэлийн албаны төлөвлөгөөт ажлыг хэрэгжүүлэн ажиллахад анхаарах асуудлуудын талаар удирдах ажилтнууд хамтран санал бодлоо солилцож, хэлэлцүүлэг өрнүүлсэн юм. Улсын бүртгэлийн ерөнхий газар 2014 онд Монгол Улсын иргэний цахим үнэмлэхийг хэрэглээнд нэвтрүүлэх ажлыг зохион байгуулах, Хуулийн этгээдийн бүртгэлийн системийг онлайн хэлбэрт шилжүүлэх, нийслэлийн хороодыг иргэний бүртгэлийн онлайн сүлжээнд холбох замаар бүртгэлийн үйлчилгээг хорооноос үзүүлэх, алслагдсан буюу хүн ам ихтэй сумдад эд хөрөнгийн эрхийн бүртгэлийн үйлчилгээг үзүүлдэг болгох, бэлэн болсон бичиг баримтыг иргэнд гараас гарт хүргэх зэрэг иргэндээ ойртсон төрийн хөнгөн шуурхай үйлчилгээг хүргэх боломжуудыг судлан хэрэгжүүлэхээр төлөвлөөд байна. Улсын бүртгэлийн байгууллагын удирдах ажилтны ээлжит сургалт, зөвлөгөөнд тус газрын удирдлагуудаас гадна төв, орон нутгийн Улсын бүртгэлийн хэлтсийн дарга нар, холбогдох мэргэжлийн байгууллагын төлөөлөл нийт 80 гаруй хүмүүс оролцлоо.