Жил бүрийн Улсын бүртгэлийн байгууллагын удирдах ажилтны нэгдсэн сургалт, зөвлөгөөний үеэр төв, орон нутгийн Улсын бүртгэлийн хэлтсийн өмнөх оны үйл ажиллагааг дүгнэж, байр эзлүүлэн шагнаж урамшуулдаг бөгөөд мөн ирэх оны үр дүнгийн гэрээг байгуулдаг уламжлалтай.

Тэгвэл энэ дагуу өнөөдөр Улсын бүртгэлийн байгууллага орон нутгийн шилдгүүдээ тодруулав. 2013 оны үйл ажиллагаа, ажлын амжилтаараа Хэнтий аймгийн Улсын бүртгэлийн хэлтэс тэргүүн байрт шалгарсан бол Орхон аймгийн Улсын бүртгэлийн хэлтэс хоёрдугаар байр, Ховд аймгийн Улсын бүртгэлийн хэлтэс гуравдугаар байрыг тус тус эзэллээ. Ажлын амжилтаараа шалгарсан дээрх аймгуудад Улсын бүртгэлийн ерөнхий газрын дарга Ц.Пүрэвдорж, тэргүүн дэд дарга Т.Баттулга, дэд дарга Р.Даваадорж нар “Батламж”, мөнгөн шагнал гардуулаад цаашдын ажилд нь амжилт хүслээ.