Төрийн үйлчилгээг иргэдэд ойртуулж, хөнгөн шуурхай болгох, хүртээмжийг нь нэмэгдүүлэх зорилгоор Улсын бүртгэлийн Ерөнхий газар Нийслэлийн Засаг даргын Тамгын газартай хамтран ажиллах санамж бичигт өнөөдөр гарын үсэг зурлаа.

Уг ажлыг зохион байгуулах хамтарсан ажлын хэсэг нийслэлийн хороодыг Улсын бүртгэлийн мэдээллийн нэгдсэн сүлжээнд шилэн кабелиар холбох ажлыг үе шаттайгаар хийж байгаа бөгөөд энэхүү хамтын ажиллагааны санамж бичгийн хүрээнд эхний ээлжинд холбогдсон 42 хороонд улсын бүртгэлийн 5 төрлийн үйлчилгээг хийхээр тохирлоо. Нийслэлийн хороодод өнөөдрийн байдлаар шилжилт хөдөлгөөний, иргэний байнгын оршин суугаа газрын бүртгэл, төрсний гэрчилгээний нөхөн олголтыг хийж байгаа бол ирэх 4 дүгээр сараас эхлэн гэрлэсний, гэрлэлт цуцалсны, гэрлэлт сэргээсний, иргэний үнэмлэх дахин олголтын, нас барсны бүртгэлийг хорооноос олгохоор болов. Цаашид Нийслэлийн 152 хороог энэ ондоо багтааж Улсын бүртгэлийн нэгдсэн сүлжээнд холбох, зарим шаардлагатай үйлчилгээг нэмж үзүүлэх боломжийг бүрдүүлэхээр хамтарсан ажлын хэсэг төлөвлөөд байна.