Албан хаагчдын анхааралд
УБЕГ-ын даргын тушаалаар Улсын бүртгэлийн байгууллагын “Хүний нөөцийн хөгжлийн хөтөлбөр” бодлогын баримт бичиг батлагдан гарлаа.
АГУУЛГА
1. Хүний нөөцийн хөгжлийн хөтөлбөрийн нийтлэг үндэслэл
1.1.Хүний нөөцийн хөгжлийн хөтөлбөрийн зорилго
1.2. Хүний нөөцийн хөгжлийн хөтөлбөрийн эрх зүйн үндэс
1.3. Хүний нөөцийн хөгжлийн хөтөлбөрийн хэрэгцээ
2. Улсын бүртгэлийн ерөнхий газрын үйл ажиллагааны стратеги
2.1. Улсын бүртгэлийн ерөнхий газрын эрхэм зорилго
2.2. Улсын бүртгэлийн ерөнхий газрын тэргүүлэх чиглэл
2.3. Улсын бүртгэлийн ерөнхий газрын үйл ажиллагааны стратегийн мөн чанар
3. Улсын бүртгэлийн ерөнхий газрын хүний нөөцийн удирдлага
3.1. Улсын бүртгэлийн ерөнхий газрын хүний нөөцийн тэргүүлэх чиглэл
3.2. Улсын бүртгэлийн ерөнхий газрын одоогийн нөхцөл /бэлэн байгаа хүний нөөц/
3.3. Улсын бүртгэлийн ерөнхий газрын хүний нөөцийн стратегийн систем
4. Улсын бүртгэлийн ерөнхий газрын хүний нөөцийн бодлого, төлөвлөлт
4.1. Хүний нөөцийн хөгжлийн хөтөлбөрийн нэгдүгээр зорилтын хүрээнд
/Албан хаагчдын нийгмийн баталгааг хангах/
4.2. Хүний нөөцийн хөгжлийн хөтөлбөрийн хоёрдугаар зорилтын хүрээнд
/Албан хаагчдыг сургалтаар хөгжүүлэх/
4.3. Хүний нөөцийн хөгжлийн хөтөлбөрийн гуравдугаар зорилтын хүрээнд
/Удирдах албан хаагчийн манлайллын чадварыг хөгжүүлэх/
4.4. Хүний нөөцийн хөгжлийн хөтөлбөрийн дөрөвдүгээр зорилтын хүрээнд
/Албан хаагчдыг ажлын байранд сонгон шалгаруулах/
4.5. Хүний нөөцийн хөгжлийн хөтөлбөрийн тавдугаар зорилтын хүрээнд
/Хүний нөөцийн мэдээллийн нэгдсэн сан бий болгох, ашиглах/
4.6. Хүний нөөцийн хөгжлийн хөтөлбөрийн зургаадугаар зорилтын хүрээнд
/Хүний нөөцийг эрсдэлийн удирдлагаар хангах/
4.7. Хүний нөөцийн хөгжлийн хөтөлбөрийн долоодугаар зорилтын хүрээнд
/Хүний нөөцийг хөгжүүлэх чиглэлээр гадаад, дотоод хамтын ажиллагааг хөгжүүлэх/
4.8. Хүний нөөцийн хөгжлийн хөтөлбөрийн наймдугаар зорилтын хүрээнд
/Албан хаагчдын зан үйл хандлагыг төлөвшүүлэх/
4.9. Хүний нөөцийн хөгжлийн хөтөлбөрийн есдүгээр зорилтын хүрээнд
/Хүний нөөцийн мэдээллийн ил тод байдлыг бүрдүүлэх/
5. Хүний нөөцийн хөгжлийн хөтөлбөрийн зохион байгуулалт
5.1. Хүний нөөцийн хөгжлийн хөтөлбөрийн үе шат
5.2. Хүний нөөцийн хөгжлийн хөтөлбөрийн санхүүжилт
5.3. Хүний нөөцийн хөгжлийн хөтөлбөрийн үр дүн
Нэг. ХҮНИЙ НӨӨЦИЙН ХӨГЖЛИЙН
ХӨТӨЛБӨРИЙН НИЙТЛЭГ ҮНДЭСЛЭЛ
1.1. Хүний нөөцийн хөгжлийн хөтөлбөрийн зорилго
Энэхүү хүний нөөцийн хөгжлийн хөтөлбөрийн зорилго нь Улсын бүртгэлийн ерөнхий газрын эрхэм зорилго, үйл ажиллагааны стратеги зорилтыг хэрэгжүүлэхэд шаардагдах хүний нөөцийг төлөвлөх, бүрдүүлэх, сонгон шалгаруулах, бэлэн байгаа хүний нөөцийг үнэлэх, ирээдүйн хэрэгцээг тодорхойлох, түүнд хүрэхэд учирч болох эрсдэлийг тооцоолж хөтөлбөр боловсруулах, гүйцэтгэлд суурилсан бүтээлч байдал, чадварлаг, тогтвор суурьшилтай боловсон хүчин бий болгохын тулд албан хаагчдын авъяас, чадварыг нээн илрүүлэх замаар төрийн захиргааны удирдлагын манлайллыг хангахад оршино.
1.2. Хүний нөөцийн хөгжлийн хөтөлбөрийн эрх зүйн орчин
Монгол Улсад Төрийн албаны тухай хууль 1995 оноос эхлэн мөрдөгдөж уг хуулиар төрийн албаны ангилал, зарчим, төрийн албан тушаал түүнд тавигдах шаардлага, төрийн албан хаагчийн эрх зүйн байдал, төрийн алба хаах болзол, журмыг зааж төрийн албан хаагчийн ажиллах нөхцөл баталгааны талаар олон асуудлыг зохицуулж өгсөн байдаг. Тухайлбал Монгол улсын Үндсэн хуулийн 46 дугаар зүйлийн 46.3-т “Төрийн албан хаагчийн ажиллах нөхцөл, баталгааг хуулиар тогтооно”, Төрийн албаны тухай хуулийн 35 дугаар зүйлийн 35.1.13-т “төрийн байгууллагаас төрийн албан хаагчийн сургалтын хөтөлбөр болон ажиллах нөхцөл, нийгмийн баталгааг хангах хөтөлбөрийг боловсруулж, хэрэгжүүлэх ажлыг арга зүйн удирдлагаар хангах ” гэж заасан байдаг.
Улсын Их Хурлын 2004 оны 24 дүгээр тогтоолоор батлагдсан "Монгол Улсын Төрийн албаны шинэтгэлийн дунд хугацааны стратегийн баримт бичиг"-ийн 4.3-т "Байгууллагын болон хүний нөөцийн хөгжлийн стратеги"-ийн " Шинэтгэлийн дунд хугацаанд сонгон шалгаруулах үйл ажиллагааг ирээдүйд шаардагдах ажилтны орон тоо, ур чадвар, мэдлэг чадвар ба зардлыг тусгасан байгууллагын хүний нөөцийн төлөвлөгөөтэй нягт уялдуулан хэрэгжүүлэх болно. Хүний нөөцийн төлөвлөлт нь байгууллагын бизнесийн стратеги төлөвлөгөөнд тусгагдсан зорилт болон стратегид үндэслэсэн байх болно. Байгууллагын бүтэц болон хөгжлийн стратеги нь хүний нөөцийн төлөвлөлтийн нэг хэсэг байх болно.", " хүний нөөцийн удирдлагын загварын хүрээнд яам, агентлагийн хүний нөөцийн удирдлагын ур чадварыг бэхжүүлэх, төрийн захиргааны болон төрийн үйлчилгээний албан тушаалтны үндсэн мэдлэг чадварыг хөгжүүлэх, албан тушаалд сонгон томилох үйл явцыг боловсронгуй болгох шаардлагатай", " Хүний нөөцийн удирдлагын мэдээллийн тогтолцоог бүрдүүлэх буюу ашиглах яам, агентлагийн ажилтанд зориулсан тусгай сургалтын хөтөлбөр боловсруулан хэрэгжүүлнэ", Хууль зүйн сайдын 2013 оны "Бүтэц орон тоо албан тушаалын ангилал, зэрэглэл, хөтөлбөр шинэчлэн батлах тухай" А/17 дугаар тушаалын 2 дугаар хавсралтад "... төрийн захиргааны удирдлагын манлайллыг хангах, хүний нөөцийн менежментийг боловсронгуй болгох, гадаад харилцааг хөгжүүлж байгууллагын үйл ажиллагааг хэвийн явуулах" гэж тус тус заасан нь энэхүү хүний нөөцийн бодлогын хөтөлбөрийг боловсруулах эрх зүйн үндэс болж байна.
1.3. Хүний нөөцийн хөгжлийн хөтөлбөрийн хэрэгцээ
Монгол Улсын Төрийн албаны шинэтгэл, Монгол Улсын Ерөнхийлөгчийн санаачилсан "Том төрөөс ухаалаг төр лүү" санаачилга нь төрийн албанд мэдлэг, ур чадвар, ажлын туршлагатай, гадаад дотоод орчны өөрчлөлтөд дасан зохицох чадвартай, орчин үеийн мэдээллийн технологийн дэвшилийг өөрийн үйл ажиллагаандаа нэвтрүүлэн хэрэглэж иргэдэд ойр хэрэгцээг нь хангасан чанартай төрийн үйлчилгээг үзүүлэх үүрэг хариуцлагын тогтолцоог бий болгохыг чухалчилж, хөгжлийн чиг хандлага энэ зүгт явж байна.
Энэ нь тус байгууллага мэдлэг, мэдээлэл бүхий авъяас чадвартай хүний нөөцтэй байх, хүний нөөцийг тасралтгүй хөгжүүлэх, бусад төрийн байгууллагад жишиг болох манлайллыг хөгжүүлж байхыг шаардаж байна.
Хоёр. УЛСЫН БҮРТГЭЛИЙН ЕРӨНХИЙ ГАЗРЫН
ҮЙЛ АЖИЛЛАГААНЫ СТРАТЕГИ
2.1. Улсын бүртгэлийн ерөнхий газрын эрхэм зорилго
Улсын бүртгэлийн ерөнхий газрын эрхэм зорилго нь иргэнд суурилсан төрийн бүртгэлийн үнэн бодитой ой санамжийг бий болгох, төр, иргэнийг холбосон бүртгэлийн үнэн бодитой ой санамжийг бий болгох, төр, иргэнийг холбосон бүртгэлийн нэгдсэн тогтолцоог бүрдүүлж, төрийн бүртгэлийн үйлчилгээгээр иргэний эрхийг хангахад оршино.
2.2. Улсын бүртгэлийн ерөнхий газрын тэргүүлэх чиглэл
Улсын бүртгэлийн ерөнхий газар нь дор дурдсан үйл ажиллагааны тэргүүлэх чиглэлтэй байна.
- Улсын хэмжээнд иргэний бүртгэл, хуулийн этгээдийн улсын бүртгэл, эд хөрөнгийн эрхийн улсын бүртгэлийг шуурхай явуулж мэдээллийн нэгдсэн сангийн нууцлал, хадгалалт, хамгаалалтын найдвартай байдлыг хангах;
- Бүртгэлийн бүх үйл ажиллагааг цаг хугацаа, орон зайнаас үл хамааран хийж гүйцэтгэх, орчин үеийн дэвшилтэт технологийг нэвтрүүлэн хэрэгжүүлэх ажлын хүрээнд бүртгэлийн бүхий л үйл ажиллагааг "цахим бүртгэл"-д хамруулах;
- Улсын бүртгэлийн үйлчилгээг иргэнд түргэн шуурхай, чирэгдэлгүй хүргэх, нэг иргэнд суурилсан нэг бүртгэл, бүртгэлийн нэгдсэн тогтолцоог бий болгож, бэхжүүлэх, улсын бүртгэлийн нэгдсэн санд суурилсан үйлчилгээний хүртээмжийг нэмэгдүүлэх, мэдээллийг хэрэглээнд оруулах дундын өгөгдлийн системийг бий болгох.
2.3. Улсын бүртгэлийн ерөнхий газрын үйл ажиллагааны стратегийн мөн чанар
Улсын бүртгэлийн ерөнхий газрын стратегийн мөн чанар нь Засгийн газрын үйл ажиллагааны хөтөлбөр, сайдын эрхлэх асуудлын хүрээний зорилт, чиг үүргийг хэрэгжүүлэхэд чиглэсэн, цаг үеэ олсон, шуурхай мэдээллээр хангах, иргэний улсын бүртгэл, хуулийн этгээдийн улсын бүртгэл, эд хөрөнгийн эрхийн улсын бүртгэлийн үйлчилгээг иргэдэд чанартай шуурхай хүргэх замаар төрөөс иргэд байгууллагад үзүүлэх нийгмийн бүх салбарыг хамарсан үйлчилгээг хүртээмжтэй болгох үйл ажиллагааны стратегийг тодорхойлоход оршино.
Гурав. УЛСЫН БҮРТГЭЛИЙН ЕРӨНХИЙ ГАЗРЫН
ХҮНИЙ НӨӨЦИЙН УДИРДЛАГА
3.1. Улсын бүртгэлийн ерөнхий газрын хүний нөөцийн тэргүүлэх чиглэл
Улсын бүртгэлийн ерөнхий газрын хүний нөөцийн удирдлага нь ОДОО БАЙГАА ХҮНИЙ НӨӨЦ, ИРЭЭДҮЙН ХЭРЭГЦЭЭ, ШААРДЛАГА, ТҮҮНИЙГ ХЭРЭГЖҮҮЛЭХ ХӨТӨЛБӨР, ТӨЛӨВЛӨГӨӨ-г гэсэн хүний нөөцийн бодлогыг үйл ажиллагаандаа мөрдлөг болгон ажиллана. Хүний нөөцийн тэргүүлэх чиглэл нь
- Улсын бүртгэлийн ерөнхий газрын хэрэгцээ шаардлагыг оновчтой тодорхойлж, түүнд тулгуурлан хүний нөөцийн бодлогыг тодорхойлох, хүний нөөцийг бүрдүүлэх;
- Хүний нөөцийн мэдээллийг удирдлагын шийдвэр гаргах хэрэгсэл болгох;
- Хүний нөөцийн чадавхийг бэхжүүлэх сургалт, хөгжлийн бодлого боловсруулан хэрэгжүүлж, суралцагч байгууллага болох;
- Карьер хөгжлийн болон цалин хөлс, шагнал, урамшууллын тогтолцоог ажлын бүтээмжийг дээшлүүлэх хөшүүрэг болгох;
- Гадаад харилцаа, хамтын ажиллагааг хүний нөөцийн чадавхийг сайжруулах хэрэгсэл болгох.
3.2. Одоогийн нөхцөл бэлэн байгаа хүний нөөц
Хууль зүйн сайдын “Улсын бүртгэлийн ерөнхий газрын үйл ажиллагааны стратеги, бүтцийн өөрчлөлтийн хөтөлбөр, зохион байгуулалтын бүтэц, орон тооны дээд хязгаарыг батлах тухай” 2013 оны А/17 дугаар тушаалаар Засгийн газрын хэрэгжүүлэгч агентлаг Улсын бүртгэлийн ерөнхий газрын бүтэц, зохион байгуулалт, орон тооны дээд хязгаарыг баталсан. Энэхүү бүтэц зохион байгуулалтын өөрчлөлтөөр Улсын бүртгэлийн байгууллага нь 1288 албан хаагчтайгаар улсын хэмжээнд бүртгэлийн үйлчилгээг иргэн, аж ахуйн нэгж байгууллагад хүргэн ажиллаж байна.
Монгол Улсын Засгийн газрын 2008 оны 78 дугаар тогтоолоор “Монгол Улсад бүртгэл, мэдээллийн нэгдсэн тогтолцоог бий болгох үндэсний хөтөлбөр”-ийг баталснаар улсын бүртгэлийн үйл ажиллагаа эрхлэх чиг үүрэг бүхий төрийн захиргааны байгууллагуудыг нэгтгэж Засгийн газрын хэрэгжүүлэгч агентлаг Улсын бүртгэлийн ерөнхий газар байгуулагдан үйл ажиллагаагаа явуулж байна.
Улсын бүртгэлийн ерөнхий газарт 174, нийслэлийн Улсын бүртгэлийн газарт 354, аймгийн Улсын бүртгэлийн хэлтэст 760 албан хаагч ажиллаж байна.
Улсын бүртгэлийн ерөнхий газар нь төрийн бүртгэлийн үйлчилгээг иргэнд ойртуулан хүргэх зорилгоор Засгийн газрын 2011 оны 20 дугаар тогтоолын дагуу нийслэлийн 152 хороо, аймгийн 330 суманд тус бүр нэг улсын бүртгэгч томилон ажиллуулж байна.
Дөрөв. УЛСЫН БҮРТГЭЛИЙН ЕРӨНХИЙ ГАЗРЫН
ХҮНИЙ НӨӨЦИЙН СТРАТЕГИ
4.1. Хүний нөөцийн хөгжлийн хөтөлбөрийн нэгдүгээр зорилтын хүрээнд /Албан хаагчдын нийгмийн баталгааг хангах/
Монгол Улсад Төрийн албаны тухай хууль 1995 оноос эхлэн мөрдөгдөж уг хуулиар төрийн албаны ангилал, зарчим, төрийн албан тушаал түүнд тавигдах шаардлага, төрийн албан хаагчийн эрх зүйн байдал, төрийн алба хаах болзол, журмыг зааж төрийн албан хаагчийн ажиллах нөхцөл баталгааны талаар олон асуудлыг зохицуулж өгсөн байдаг. Тухайлбал Монгол улсын Үндсэн хуулийн 46 дугаар зүйлийн 46.3-т “Төрийн албан хаагчийн ажиллах нөхцөл, баталгааг хуулиар тогтооно”, Төрийн албаны тухай хуулийн 35 дугаар зүйлийн 35.1.13-т “ төрийн байгууллагаас төрийн албан хаагчийн сургалтын хөтөлбөр болон ажиллах нөхцөл, нийгмийн баталгааг хангах хөтөлбөрийг боловсруулж, хэрэгжүүлэх ажлыг арга зүйн удирдлагаар хангах ” гэж заасан байдаг. Хуулийн заалт болон тус байгууллагын албан хаагчдын нийгмийн баталгааг хангах чиглэлийн бодит хэрэгцээг үндэслэж тодорхой ажлыг зохион байгуулна.
Дээрх зорилтын хүрээнд дараах арга хэмжээг авч хэрэгжүүлнэ.
- Улсын бүртгэлийн ерөнхий газрын албан хаагчийн ажиллах нөхцөл, нийгмийн баталгааг хангах хөтөлбөрийг боловсруулж батлуулах;
- Улсын бүртгэлийн ерөнхий газрын орон сууцны бие даасан төсөл хэрэгжүүлэх;
- Засгийн газраас хэрэгжүүлж байгаа орон сууцны хөнгөлөлттэй зээлийн хөтөлбөр, хямд чанартай орон сууцанд тус байгууллагын албан хаагчдыг идэвхтэй хамруулах;
- Албан хаагчдын цалин, хөлс урамшууллын системийг өрсөлдөх чадвартай болгох;
- Албан хаагчдын эрүүл мэндийг хамгаалах, урьдчилан сэргийлэх, тэдэнд бие бялдар гоо зүйн төлөвшил олгох чиглэлээр хөтөлбөр хэрэгжүүлэх;
- Орон нутгийн ажлын байрны орчин нөхцөлийг шат дараалалтай сайжруулах;
- Албан хаагчийн нийгмийн баталгааг хангах чиглэлээр хөрөнгө, нөөцийг тус газрын төсөвт жил бүр тусгуулан хэрэгжүүлж байх.
4.2. Хүний нөөцийн хөгжлийн хөтөлбөрийн хоёрдугаар зорилтын хүрээнд /Албан хаагчдыг сургалтаар хөгжүүлэх/
Улсын бүртгэлийн байгууллагад ажиллагсдад албан үүргээ хэрэгжүүлэхэд зайлшгүй шаардлагатай мэдлэг, ур чадварыг байнга, тасралтгүй эзэмшүүлэх, мэдлэг боловсролыг дээшлүүлэх, ажил хариуцах чадварыг сайжруулах замаар Улсын бүртгэлийн байгууллага нь үйл ажиллагааны чадавхи сайтай төрийн албыг бүрдүүлж суралцагч байгууллага болох зорилгоор сургалтыг үе шаттайгаар явуулна.
Дээрх зорилтын хүрээнд дараах арга хэмжээг авч хэрэгжүүлнэ.
- Албан хаагчдын сургалтын хөтөлбөр боловсруулж, батлуулах;
- Улсын бүртгэгч бэлтгэх сургалтыг хэвшүүлэх, ялангуяа орон нутгийн улсын бүртгэгч нарыг мэдлэг, мэдээллийг нэмэгдүүлэх чиглэлд анхаарах;
- Мэдлэг, чадвар, зан үйлийн сургалтыг тухай бүр зохион байгуулах;
- Төрийн албаны манлайлах чадварын сургалтыг зохион байгуулах;
- Улсын бүртгэгч нарыг ажлын байранд мэргэших боломжийг хангаж сэлгэн ажиллуулах;
- Суралцагч байгууллага болох зорилт тавих;
4.3. Хүний нөөцийн хөгжлийн хөтөлбөрийн гуравдугаар зорилтын хүрээнд /Удирдах албан хаагчийн манлайллын чадварыг хөгжүүлэх/
Манлайлал гэдэг нь хувь хүн тодорхой зорилгод хүрэхийн тулд бусдад нөлөөлөл үзүүлэх үйл ажиллагаа юм. Манлайлах үйл ажиллагаа гэдэг нь Төрийн байгууллагууд удирдлагын тодорхойлсон зорилтыг хэрэгжүүлэхийн тулд өөрийн удирдлагад байгаа хүмүүстэй нөлөөлөх явдал юм. Манлайлал болон баг бүрдүүлэх ур чадварыг хөгжүүлэх шаардлагатай. Ерөнхий менежерээс байгууллагынхаа хэмжээнд стратегийн түвшинд бодож сэтгэх, бaйгууллагын дотоод болон гадаад орчны хүрээнд үр бүтээлтэй ажлын харилцааг буй болгох, бусадтай нөлөө бүхий ажлын харилцаа тогтоох, өөрийн биеэр үлгэрлэн өөрийгөө дайчлан, шударгаар ажиллах, үр дүнд хүрэх явдал нь манлайллын шинж юм.
Улсын Их Хурлын 2003 оны 13 дугаар тогтоолоор баталсан "Төрийн жинхэнэ албаны удирдах албан тушаалд томилогдох ажилтныг сонгон шалгаруулах журам"-ын дагуу удирдах албан тушаалтныг илүү нээлттэй бөгөөд өрсөлдөөний зарчмаар сонгон шалгаруулж томилох нь удирдах албан тушаалын манлайллыг хангахад чухал ач холбогдолтой.
Дээрх зорилтын хүрээнд дараах арга хэмжээг авч хэрэгжүүлнэ.
- Төсвийн шууд захирагч болон менежер нарыг төрийн албаны манлайлах ур чадварыг нэмэгдүүлэх сургалтанд тухай бүр хамруулж тасралтгүй байдлыг хангах;
- Удирдах албан тушаалын сул орон тоог Улсын Их Хурлаас баталсан журмын дагуу нөхөх;
- Төрийн албаны зөвлөлийн салбар зөвлөлийн үйл ажиллагааны төлөвлөгөөнд удирдах албан тушаалын манлайллын талаар тусгах;
- Төсвийн шууд захирагчаас менежер нартай байгуулах үр дүнгийн гэрээнд манлайллын шалгуур үзүүлэлт, манлайлах ур чадварт өгөх үнэлгээг тусгах.
4.4. Хүний нөөцийн хөгжлийн хөтөлбөрийн дөрөвдүгээр зорилтын хүрээнд /Албан хаагчдыг ажлын байранд сонгон шалгаруулах/
Улсын бүртгэлийн ерөнхий газар нь Төрийн албаны тухай хууль, Улсын бүртгэлийн ерөнхий хууль, Төрийн жинхэнэ албан тушаалд анх орох иргэний нөөц бүрдүүлэх журмын дагуу Төрийн захиргааны болон Төрийн үйлчилгээний албан хаагчийг сонгон шалгаруулж ажилд томилдог. Мөн ажлын зайлшгүй шаардлагаар Засгийн газрын 2003 оны “Тєсвийн байгууллагын зарим ажил їйлчилгээг гэрээгээр гїйцэтгэх тухай” 233 дугаар тогтоолын дагуу төрийн байгууллагын зарим ажил үйлчилгээг гэрээгээр гүйцэтгүүлж гэрээт албан хаагчдыг авч ажиллуулж байна.
Улсын бүртгэлийн ерөнхий газрын газар, хэлтэст ажлын сул орон тоо гарсан тохиолдолд эхлээд байгууллагын дотоод албан хаагчдаас тус ажлын байранд тавигдах болзол шаардлагыг хангаж байгаа албан хаагчийг дэвшүүлнэ. Албан хаагч ажлын байранд дэвшин ажиллахын тулд дараах шаардлагыг хангасан байна. Үүнд:
- Ажлын байрны тодорхойлолтод заасан чиг үүргээ бүрэн биелүүлсэн;
- Үр дүнгийн гэрээгээр сүүлийн жилүүдэд тогтмол "А" үнэлгээ авч байсан;
- Ажлын цаг ашиглалт сайн баримталдаг;
- Албан хаагчдыг хамарсан олон нийтийн ажилд идэвхтэй оролцдог;
- Сахилгын шийтгэлгүй.
Дээрх шаардлагыг хангасан албан хаагчийг сул гарсан ажлын байранд дэвшүүлэн ажиллуулах тухай тухайн харъяалах нэгжийн саналыг үндэслэн Ерөнхий газрын дарга шийдвэрлэнэ. Шаардлагатай гэж үзвэл даргын зөвлөлийн хурлаар тухайн асуудлыг хэлэлцүүлж болно.
Дээрх зорилтын хүрээнд дараах арга хэмжээг авч хэрэгжүүлнэ.
- Удирдах албан тушаалтны нөөцийн жагсаалт бүрдүүлэх;
- Удирдах болон төрийн жинхэнэ, төрийн үйлчилгээний албан тушаалын сул орон тоог холбогдох журмын дагуу нийтэд мэдээлэх;
- Төрийн захиргааны болон төрийн үйлчилгээний албан тушаалын сул орон тоо гарсан тохиолдолд тус байгууллагын дотоод сүлжээгээр албан хаагчдад мэдээлдэг байх;
- Ажлын байраа өөрчлөхөөр хүсэлт гаргасан албан хаагчдын судалгааг улирал, хагас, бүтэн жилээр нэгтгэж удирдлагад танилцуулдаг байх;
- Албан хаагчдыг ажлын байранд хөрвөх чадварыг бий болгох зорилгоор улсын бүртгэгчийн хувийн дугаар бүхий тэмдгийг нэг хэмжээ, загвар болгон шинэчлэх.
4.5. Хүний нөөцийн хөгжлийн хөтөлбөрийн тавдугаар зорилтын хүрээнд /Хүний нөөцийн мэдээллийн нэгдсэн сан бий болгох, ашиглах/
Улсын бүртгэлийн байгууллагын албан хаагчийн хувийн мэдээллийг холбогдох хууль тогтоомжийн хүрээнд цаасан болон цахим хэлбэрээр бүрдүүлэн хүний нөөцийн мэдээллийн санг бий болгож өдөр тутмын үйл ажиллагаандаа ашиглана.
Улсын бүртгэлийн ерөнхий газар нь албан хаагчийн хувийн мэдээллийг багтаасан цаасан болон цахим гэсэн 2 төрлийн мэдээллийн сантай байна. Шинээр ажилд томилогдохоос эхлээд тухайн албан хаагч ажлаас чөлөөлөгдөх хүртэл бүх мэдээллийг багтаасан цаасан сан/хувийн хэрэг/-г эрхлэн хөтлөх бөгөөд тухай бүр мэдээллийг багтааж товёогжуулна. Албан хаагчийн хувийн хэргийг эрхлэн хөтлөхдөө холбогдох дүрэм, журмыг мөрдөж ажиллана. Ажилд орох хүсэлтийг online-аар болон цаасан хэлбэрээр авна. Улирал, хагас, бүтэн жил тутамд тус байгууллагад ажилд орохоор хүсэлт гаргасан иргэдийн мэдээллийг холбогдох хүснэгтийн дагуу нэгтгэж гаргана. Жилийн эцэст ажилд орох хүсэлт гаргасан иргэдийн мэдээллийг архивын нэгж болгон цагаан толгойн үсгийн дарааллын дагуу дугаарлаж байгууллагын архивт хүлээлгэн өгнө.
Дээрх зорилтын хүрээнд дараах арга хэмжээг авч хэрэгжүүлнэ.
- Улсын бүртгэлийн ерөнхий газрын албан хаагчийн хүний нөөцийн мэдээллийн сан бүрдүүлэх, ашиглах журмыг батлуулах;
- Ажилд орох хүсэлт гаргасан иргэдийн мэдээлэл үүсгэх; /online болон цаасаар хүсэлтийг хүлээн авах/
- Ажлын байр өөрчлөх хүсэлт гаргасан албан хаагчдын мэдээлэл үүсгэх;
- Улсын бүртгэлийн ерөнхий газрын албан хаагчийн хувийн хэрэг хөтлөх журам батлуулах;
- Хүний нөөцтэй холбоотой аливаа шийдвэрийг тус байгууллагын удирдлагын зүгээс гаргахад хүний нөөцийн мэдээллийн нэгдсэн сангийн тоо баримтанд тулгуурладаг байх;
- Хүний нөөцийн мэдээллийн нэгдсэн сангийн нууцлалыг хангах;
- Төрийн албаны зөвлөлд жил бүрийн 01 дүгээр сарын 15-ны өдрийн дотор хүний нөөцийн мэдээллийг хүргүүлдэг байх.
4.6. Хүний нөөцийн хөгжлийн хөтөлбөрийн зургаадугаар зорилтын хүрээнд /Хүний нөөцийг эрсдэлийн удирдлагаар хангах/
Байгууллагын удирдлага нь зорилт, чиг үүргээ тасралтгүй хэрэгжүүлж чадах хүний нөөцийг төлөвлөж, ямар ч нөхцөл байдалд үүсч болох үр дагаврыг тооцсон, түүнийг байнгын бэлэн байдалд ашиглах магадлал, бодлоготой байна.
Дээрх зорилтын хүрээнд дараах арга хэмжээг авч хэрэгжүүлнэ.
- Хүний нөөцийн бодлого, төлөвлөлтийн талаар албан хаагчдад таниулах;
- Байгууллагын зорилго, зорилт түүнд хүрэхэд учирч болох эрсдэл, тэр дундаа хүний нөөцийн эрсдэлийг тооцох;
- Албан хаагчдыг сэлгэн, шилжүүлэн ажиллуулж ажлын байранд хөрвөх чадварыг бий болгох;
- Холбогдох хууль, дүрэм, журмын болон бусад сургалтыг тухай бүр зохион байгуулж албан хаагчдыг мэдээ, мэдээллээр хангах;
- Албан хаагчдад чиглэсэн цалин нэмэгдэл, болон бусад эдийн засгийн хөшүүргийг дэмжих;
- Албан хаагчдыг ажлын байранд тогтвор суурьшилтай ажиллах нөхцөлийг бүрдүүлэх;
- Албан хаагчдыг мэргэшлээ дээшлүүлэхэд нь дэмжлэг үзүүлэх;
- Улс орны эдийн засгийн өсөлт, хүн амын төвлөрлийг тооцоолсон бодит судалгааг хүний нөөцийн бодлого төлөвлөлтөд ашиглах;
- Байгууллагын бүтэц зохион байгуулалтын оновчтой хувилбарыг бий болгох;
- Ажил үүргийн давхардал, ажлын хэт их ачлааллыг оновчтой хувиарлах;
- Аймаг, дүүргийн хүн ам, нутаг дэвсгэр, хөгжлийн байдал, эд хөрөнгийн бүртгэлийн байдалтай уялдуулан улсын бүртгэгчдийн ачааллыг тэнцвэржүүлэх зорилгоор тодорхой ажлыг зохион байгуулах.
4.7. Хүний нөөцийн хөгжлийн хөтөлбөрийн долоодугаар зорилтын хүрээнд
/Хүний нөөцийг хөгжүүлэх чиглэлээр гадаад, дотоод хамтын ажиллагааг хөгжүүлэх/
Тус байгууллагын явагдаж байгаа бүхий л үйл ажиллагаа хүний хүчин зүйлээс хамаарч сайн, муу үр дагавартай байна. Иймээс тус байгууллагын хүний нөөцийн бодлогод гадаад, дотоод хамтын ажиллагааг хөгжүүлэх чиглэлээр түлхүү анхаарч ажиллана. Ялангуяа хүний нөөцийн мэргэжилтэн нарын мэдлэг ур чадварыг дээшлүүлэх чиглэлээр тодорхой ажлыг зохион байгуулна. Энэ нь тус байгууллагын албан хаагчдын хөгжилд тодорхой үр дүнтэй байна.
Дээрх зорилтын хүрээнд дараах арга хэмжээг авч хэрэгжүүлнэ.
- Төрийн албаны зөвлөлийн салбар зөвлөлөөс хүний нөөцийн удирдлага болон удирдах албан тушаалын манлайллын чиглэлээр холбогдох сургалтыг зохион байгуулж үр дүнд хүрэх;
- Төрийн болон хувийн хэвшлийн аж ахуйн нэгжийн хүний нөөцийн бодлого, зорилгын талаар судлах, харилцан туршлага, мэдээ, мэдээлэл солилцох чиглэлээр хамтран ажиллах;
- Олон улсын байгууллагаас хүний нөөцийг хөгжүүлэх чиглэлд мэргэшил арга зүйн дэмжлэг туслалцаа авах;
- Хүний нөөцийн мэргэжилтэнг хүний нөөцийн чиглэлээр нарийн мэргэшүүлэх, холбогдох сургалтад хамруулах;
- Гадаадын бусад орны төрийн байгууллагын хүний нөөцийн бодлого, чиг хандлагыг судлах, харилцан туршлага солилцох.
4.8. Хүний нөөцийн хөгжлийн хөтөлбөрийн наймдугаар зорилтын хүрээнд
/Албан хаагчдын cонирхол, чиг хандлагыг төлөвшүүлэх/
Тус байгууллагын албан хаагчдын ажилдаа идэвхи сонирхолтой байлгахын тулд тодорхой зохион байгуулалт бүхий бүлэг, баг, хэсгийг дэмжин ажиллана. Энэхүү бүлэг зохион байгуулалтын нэгж нь албан бус байх бөгөөд дараах төрлөөр үйл ажиллагаа явуулж болно. Спортын, урлагын, экологийн, залуучуудын, эрүүл мэндийн гэх мэт. Энэхүү бүлэг, нэгжид тус байгууллагад ажилладаг ямар ч түвшний албан хаагч хамрагдаж болох бөгөөд Улсын бүртгэлийн ерөнхий газрын албан хаагчдын хамт олонч уур амьсгалыг бүрдүүлэх, амралт чөлөөт цагийг зөв боловсон өнгөрүүлэх зорилготой байна. Шаардлагатай тохиолдолд энэхүү төрөлжсөн бүлэг нь тус байгууллагаас зохион байгуулах албан ёсны арга хэмжээг зохион байгуулж болно. Жишээ нь сагс, шатар болон спортын бусад тэмцээнийг спортын бүлэг, урлагын наадам, шинэ жилийн урлагийн тоглолтыг урлагийн бүлэг гэх мэт.
Дээрх зорилтын хүрээнд дараах арга хэмжээг авч хэрэгжүүлнэ.
- Бүлэг зохион байгуулалтын нэгжийг бодлогоор дэмжих;
- Хүмүүс хоорондын харилцааг дэмжих, харилцан ойлголцох нөхцөл байдлыг бүрдүүлэх, хамтын ажиллагааны дэвшилттэй арга барил, арга хэрэгсэл бий болгох, хэрэгжүүлэх;
4.9. Хүний нөөцийн хөгжлийн хөтөлбөрийн есдүгээр зорилтын хүрээнд
/Хүний нөөцийн мэдээллийн ил тод байдлыг бүрдүүлэх/
Монгол Улсын Их Хурлын 2011 оны 06 дугаар сарын 16-ны өдөр баталсан "Мэдээллийн ил тод байдал ба мэдээлэл авах эрхийн тухай" хуулийн 6 дугаар зүйлийн 6.1.2, 8 дугаар зүйлийн 8.1, 8.1.1, 8.1.2, 8.1.3, 8.1.4, 8.1.5 дахь заалт, Засгийн газрын 2013 оны 411 дүгээр тогтоолоор баталсан "Мэдээллийн ил тод байдлыг хангах нийтлэг журам"-ыг тус тус үндэслэж Улсын бүртгэлийн ерөнхий газрын хүний нөөцийн мэдээллийг байгууллагын цахим хуудсаар болон бусад хэлбэрээр нийтэд мэдээллэнэ.
Дээрх зорилтын хүрээнд дараах мэдээллийг ил тод байлгана.
- Сул орон тооны зарыг цахим хуудас болон мэдээллийн самбартаа ойлгомжтой байдлаар байрлуулан тухай бүр шинэчлэх, энэ тухай олон нийтийн мэдээллийн хэрэгслээр зарлах;
- Төрийн захиргааны албан хаагчийн болон Улсын бүртгэлийн байгууллагын ажилтны ёс зүйн дүрмийг цахим хуудас болон мэдээллийн самбартаа ойлгомжтой байдлаар байрлуулан тухай бүр шинэчлэх;
- Хүний нөөцийн стратеги, хөгжлийн хөтөлбөр түүний хэрэгжилтийг цахим хуудсандаа ойлгомжтой байдлаар байрлуулан тухай бүр шинэчлэх;
- Хүний нөөцийн удирдлагын ил тод байдлыг хангах чиглэлээр авч хэрэгжүүлж байгаа арга хэмжээний талаар цахим хуудсандаа ойлгомжтой байдлаар байрлуулан мэдээлж байх;
- Албан хаагчдын ажлын гүйцэтгэлийн чиглэлээр холбогдох мэдээ, мэдээллийг тухай бүр байршуулж шинэчлэх;
- Төрийн албаны зөвлөлийн салбар зөвлөл болон ёс зүйн хорооны үйл ажиллагааны төлөвлөгөө, хурлын төлөвлөгөө хурлаас гарсан шийдвэрийн хураангуйг тухай бүр мэдээлэх, шинэчлэх;
- Улсын бүртгэлийн ерөнхий газрын нийт албан хаагчдад хамаарсан болон хуульд заасан, нийтэд мэдээлэх боломжтой тушаалын тухай бүр байрлуулах, шинэчлэх;
- Албан хаагч болон нийтэд хэрэгтэй мэдээллийг файл хэлбэрээр байршуулах /үүнд: төрийн албан хаагчийн анкет, ашиг сонирхлын урьдчилсан мэдүүлэг, үр дүнгийн гэрээний загвар гэх мэт/
- хууль тогтоомжид заасан бусад мэдээллийг мэдээлэх
Тав. ХҮНИЙ НӨӨЦИЙН ХӨГЖЛИЙН ХӨТӨЛБӨРИЙН ЗОХИОН БАЙГУУЛАЛТ
5.1. Хүний нөөцийн хөгжлийн хөтөлбөрийн үе шат
Энэхүү хүний нөөцийн хөгжлийн хөтөлбөр нь 2014-2016 оны хооронд тус байгууллагын хэмжээнд хэрэгжих богино хугацааны зорилттой байна. 2 жилийн хугацаанд хөтөлбөр хэрэгжүүлж дунд болон хэтийн зорилт бүхий хөтөлбөрийг дэвшүүлэн ажиллана.
5.2. Хүний нөөцийн хөгжлийн хөтөлбөрийн санхүүжилт
Энэхүү хүний нөөцийн хөгжлийн хөтөлбөр нь санхүүгийн дараах эх үүсвэрээс бүрдэнэ.
- Улсын бүртгэлийн ерөнхий газрын тухайн жилийн батлагдсан төсөв;
- Олон улсын байгууллагын төсөл, хөтөлбөр;
- Бусад
Хүний нөөцийн хөгжлийн хөтөлбөрийн ерөнхий удирдлагыг Тамгын газрын дарга хариуцан гүйцэтгэнэ. Жил бүрийн эхэнд хөтөлбөр хэрэгжүүлэх үйл ажиллагааны төлөвлөгөө батлах бөгөөд хагас, бүтэн жилээр гүйцэтгэлийг тооцож жилийн эцэст даргын зөвлөлийн хуралд танилцуулна. Шаардлагатай бол хөтөлбөрийн хэрэгжилтийг түргэвчлэх чиглэлээр шийдвэр гаргаж болно.
5.2. Хүний нөөцийн хөгжлийн хөтөлбөрийн үр дүн
Улсын бүртгэлийн ерөнхий газар нь хүний нөөцийн нэгдсэн бодлого, төлөвлөлтэй явж ирснээр дараах үр дүн гарахаар тооцоолж байна. Үүнд:
- Хүний нөөцийн удирдлага, удирдах албан хаагчийн манлайлах чадвар дээшилж, төлөвшинө.
- Албан хаагчдын дунд хамт олонч уур амьсгал, нэгэн зорилго чиглэлд чиглэсэн бүтээлч хандлага бий болно.
- Албан хаагчдын ажилдаа хандах хандлага сайжирч холбогдох хууль, тогтоомжийн хэрэгжилт хангагдана.
- Хүний нөөцийн гадаад хамтын ажиллагаа өргөжинө.
- Хүний нөөцийн хувиарлалт сайжирч боловсон хүчний мэргэшсэн байдал хангагдана.
- Албан хаагчдын мэдлэг, ур чадвар дээшилнэ.
- Төрийн албаны тухай хуулинд заасан албан хаагчийн нийгмийн баталгаа хангагдана.
- Албан хаагчийн мэдээллийн нэгдсэн сан бүхий бааз бүрдэж удирдлагын түвшинд шийдвэр гаргахдаа хүний нөөцийн мэдээ, мэдээлэлд тулгуурладаг чиг хандлага тогтоно.
- Хүний нөөцийн үйл ажиллагаанд орчин үеийн мэдээллийн технологийн ололттой байдал нэвтэрч, үйл ажиллагаа түргэн шуурхай болно.
- Улсын бүртгэлийн ерөнхий газрын эрхэм зорилго, зорилт, чиг үүргийг хэрэгжүүлэхэд шаардагдах хүний нөөцийн чадварлаг нөөц бүрдэнэ.
ТАМГЫН ГАЗАР
