Улсын бүртгэлийн байгууллага үүсэн байгуулагдсаны 73 жилийн ой, “Улсын бүртгэлийн ажилтны өдөр”-ийг 4 дэх жилдээ тэмдэглэн өнгөрүүлж буй энэ цаг мөчид улсын бүртгэлийн хууль тогтоомж, эрх зүйн актын талаар нэгдсэн ойлголт өгөх, байгууллагын дотоод үйл ажиллагаатай холбогдсон танин мэдэхүйн өргөн цар хүрээтэй мэдээллээр хангах зорилгоор “Улсын бүртгэл” улирал тутмын сэтгүүлийн Анхны дугаарыг гаргаж, нийт албан хаагч нартаа бэлэг болгон өргөн барилаа.

Улирал тутам гарах тус сэтгүүл нь үндсэн дөрвөн булангаас бүрдэж буй бөгөөд хамгийн гол нь мэдээлэл тус бүрийн бүтэц агуулгыг тодорхой ойлгомжтой байдлаар хүргэх, мэдээллийн агууламж, багтаамжийг өргөн цар хүрээтэй, сонирхолтой байдлаар хүргэхийг зорисон билээ. Анхны дугаараас Улсын бүртгэлийн байгууллагын талаарх танилцуулга, одоо мөрдөгдөж байгаа болон шинээр батлагдсан хууль тогтоомж, дүрэм журмын жагсаалт, улсын бүртгэлийн үйлчилгээний статистик үзүүлэлт, хэрэгжиж байгаа төсөл хөтөлбөр, ажлын онцлог, чиг үүрэгтэй холбоотой заавар зөвлөмж зэрэг мэдээллийг хүртэх юм. Түүнээс гадна фото сурвалжлага, хөрөг ярилцлага, шүлэг, яруу найраг, дурсамж, мэдээллийн ил тод байдлыг хангахад чиглэсэн цаг үе, үйл явдлаас гадна өнөөгийн улсын бүртгэлийн байгууллагын үйл ажиллагаа, чиг үүргийн талаарх мэдээ мэдээллийг авах боломжтой. Дашрамд дурьдахад энэхүү сэтгүүл нь бүртгэлийн байгууллагын үндсэн түүхэн баримт болохын хувьд байгууллагын маань дараа дараагийн үед гарын авлага, тус газрын түүх бичлэгийн үндсэн эх болж үлдэж байгаагаараа ихээхэн ач холбогдолтой төдийгүй цаашид энэ байгууллагыг уламжлан авч явах хойч үеийн хүн бүрийн хүчин зүтгэл шингэж байхын ерөөл дэвшүүлье.

Сайн үйлс дэлгэрэх болтугай.