Улсын бүртгэлийн ажилтны өдөр тохиож байгаа энэ цаг мөчид бүртгэлийн байгууллагын нийт ажилтан, албан хаагчид та бүхэнтэй “Улсын бүртгэл” улирал тутмын сэтгүүлийн анхны дугаараар мэндчилж байгаадаа баяртай байна.
Төрийн бодлогын томоохон баримт бичгүүдэд төрөөс бүртгэлийн үйл ажиллагаанд баримтлах стратегийн зорилтуудыг тодорхойлон, улсын бүртгэлийн нэгдсэн тогтолцоог бий болгож бэхжүүлэх зорилгоор улсын бүртгэлийн байгууллагуудын үйл ажиллагааг нэгтгэн зохион байгуулж 2009 онд Улсын бүртгэлийн ерөнхий газрыг Тэргүүн шадар сайдын эрхлэх асуудлын хүрээнд хамааруулан байгуулсан билээ. Өнгөрсөн хугацаанд Монгол Улсад бүртгэлийн нэгдсэн тогтолцоог бүрдүүлж бэхжүүлэх, бүртгэлийг төгөлдөршүүлэх, иргэний шинэчилсэн бүртгэл явуулах, иргэний цахим үнэмлэх олгох, цахим мэдээллийн нэгдсэн сан байгуулах, төрийн бүртгэлийн үйлчилгээг иргэдэд шуурхай хүргэх замаар иргэний эрхийг баталгаажуулах, төрийн үйлчилгээний шинэ орчныг бүрдүүлэхээр томоохон зорилтот ажлуудыг амжилттай гүйцэтгээд байна. Тухайлбал, Иргэний шинэчилсэн бүртгэлээр иргэний биеийн давхцахгүй өгөгдөлд суурилсан мэдээллийн сан үүсгэснээр бүртгэлийн давхардлыг арилган түүний бодит байдлыг хангах нөхцлийг бүрдүүлж, энэхүү мэдээллийн санд үндэслэн иргэний цахим үнэмлэх хэвлэх, олгох ажлыг амжилттай зохион байгуулсан. Монгол улсад анх удаа иргэний бүртгэл мэдээллийн санд суурилсан сонгуулийг зохион байгуулж явуулахад улсын бүртгэлийн байгууллага нь Монгол Улсын Их Хурлын сонгуулийн тухай хууль, Аймаг, сум, дүүргийн Иргэдийн төлөөлөгчдийн хурлын сонгуулийн тухай хууль, Монгол улсын Ерөнхийлөгчийн сонгуулийн тухай хуулиудад заасан чиг үүргийг амжилттай хэрэгжүүлж ажилласан гэдгийг цохон тэмдэглэмээр байна. Төрийн үйлчилгээ иргэнд ойрхон байж, иргэддээ чанартай, хүртээмжтэй үйлчилгээг хүргэх зорилтын дор төр засгаас бодлогоор дэмжин хэрэгжүүлж буй “Цахим засаглал” хөтөлбөрийг дэмжиж бүртгэлийн байгууллага үйлчилгээгээ цахимжуулах замаар иргэдэд түргэн шуурхай хүргэх алхмуудыг хийж байна. Үүний илрэл нь гадаад дотоодын олон байгууллагуудтай хамтран хэрэгжүүлж буй төсөл хөтөлбөрүүдийн үр дүнд эд хөрөнгийн, иргэний, хуулийн этгээдийн бүртгэлийн архивын баримтыг цахимжуулах, мэдээллийн технологийн дэвшилтэт арга технологийг ашиглан системийг шинэчлэх, шинэ системийг нэвтрүүлэх ажлыг үе шаттайгаар амжилттай хэрэгжүүлж байгаа явдал юм. Нөгөө талаас улсын бүртгэлийн үйлчилгээг хялбаршуулж, түргэн шуурхай, боловсронгуй болгох ажлын хүрээнд төрийн үйлчилгээний цахим машинаар иргэний бүртгэлийн лавлагаа олгох, эд хөрөнгийн эрхийн бүртгэлийн лавлагаа, мэдээллийг банкны байгууллагатай цахим хаягаар солилцох ажлыг хэрэгжүүлсэн нь хүнд сурталгүй төрийн шинэлэг үйлчилгээ болсныг иргэдийн зүгээс онцолж байгаа юм. Цаашид нийслэлийн хороодыг иргэний бүртгэлийн онлайн сүлжээнд холбох замаар бүртгэлийн үйлчилгээг хорооноос үзүүлэх, алслагдсан буюу хүн ам ихтэй сумдад эд хөрөнгийн эрхийн бүртгэлийн үйлчилгээг үзүүлдэг болгох, хуулийн этгээдийн бүртгэлийн системийг онлайн хэлбэрт шилжүүлэх, бэлэн болсон бичиг баримтыг иргэнд гараас гарт нь хүргэх зэрэг иргэндээ ойртсон төрийн хөнгөн шуурхай үйлчилгээг хүргэх боломжуудыг судлан, хэрэгжүүлэхээр төлөвлөн ажиллаж байгааг хэлэхэд таатай байна. Бүртгэлийн байгууллагын үүсэл, хөгжил, түүнчлэн иргэнд суурилсан төрийн бүртгэлийн үнэн бодитой ой санамжийг бий болгох, төр иргэнийг холбосон бүртгэлийн нэгдсэн тогтолцоог бэхжүүлэх, төгөлдөршүүлэх, төрийн бүртгэлийн үйлчилгээгээр иргэний эрхийг хангах эрхэм үйлсэд бие сэтгэл, мэдлэг чадвараа дайчлан ажиллаж байгаа улсын бүртгэлийн байгууллагын нийт хамт олон, үе үеийн ахмадууд, тэдний гэр бүлийнхэн, хамтран ажилладаг байгууллага тэдний хамт олонд “Улсын бүртгэлийн ажилтны өдөр”-ийг тохиолдуулан чин сэтгэлийн мэндчилгээ дэвшүүлье.
