Өнөөдөр Улсын бүртгэлийн ерөнхий газар Сонгуулийн ерөнхий хороо, Гадаад харилцааны яамтай хамтран сэтгүүлчдэд мэдээлэл хийлээ.

Хэвлэлийн хуралд тус газрын дарга Ц.Пүрэвдорж, Сонгуулийн ерөнхий хорооны дарга Ч.Содномцэрэн, Гадаад харилцааны яамны Төрийн нарийн бичгийн дарга бөгөөд Гадаадад байгаа иргэдийн санал авах ажлыг зохион байгуулах комиссын дарга Г.Цогтсайхан нар оролцлоо.Монгол Улсын Ерөнхийлөгчийн сонгуулийн тухай хуулийн хэрэгжилт болон 6 дугаар сарын 26-нд улсын хэмжээнд зохион байгуулагдах сонгуулийн үйл явцтай холбогдуулж тал талын бэлтгэл ажлыг хамтран хангаж байна. Тухайлбал, 6 дугаар сарын 16-ний байдлаар улсын хэмжээнд 1.856190 сонгогч саналаа өгөхөөр сонгогчдын нэрийн жагсаалтад бүртгэгдээд байна. Тэдгээр сонгогчоос хэд нь зөөврийн битүүмжилсэн хайрцгаар саналаа өгөх вэ гэдэг нарийн тоо хараахан гараагүй байгаа бөгөөд хуульд зааснаар зөөврийн хайрцгаар санал хураах ажиллагаа зургадугаар сарын 25-нд зохион байгуулагдах юм байна. Мөн Монгол Улсын Ерөнхийлөгчийн сонгуулийн тухай хуульд заасны дагуу зургадугаар сарын 14-16-ний хооронд гадаад оронд ажиллаж, амьдарч байгаа монголчуудын саналыг авах ажил зохион байгуулагдсан юм. Энэ дагуу Монгол Улсын Ерөнхийлөгчийн сонгуульд саналаа өгөхөөр 6478 иргэн бүртгүүлснээс 4248 сонгогч саналаа өгчээ. Үүнийг өнгөрсөн жил болж өнгөрсөн УИХ-ын сонгуультай харьцуулахад сонгуульд оролцохоор бүртгүүлсэн сонгогчийн тоо, саналаа өгсөн сонгогчийн тоо аль аль нь 50 хувиар өссөн үзүүлэлт юм байна. Гадаад дахь монголчуудын хувьд нийт 39 дипломат төлөөлөгчийн газраа очиж саналаа өгсөн, ингэхдээ саналаа өгсөн нийт сонгогчийн ирц 68.2 хувьд хүрсэн гэж Сонгуулийн ерөнхий хорооны дарга онцоллоо. Гэхдээ цагийн зөрүүгээс шалтгаалж хамгийн сүүлд Улаанбаатар хотын цагаар өнөөдөр 13.00 цагт Сан-Францискод санал хураалтыг хаажээ. Мөн сонгууль зохион байгуулахтай холбогдуулж 22 сонгуулийн хороо, сум, дүүргийн 339 сонгуулийн хороо, 1896 хэсгийн хороо тус бүр байгуулагдан санал авах ажлыг зохион байгуулахаар бэлтгэлээ хангажээ. Үүнд 15863 төрийн албан хаагч ажиллаж буй юм байна. Хуульд заасны дагуу Монгол Улсын Ерөнхийлөгчийн сонгууль автоматжуулсан системээр зохион байгуулна. Тиймээс бэлтгэл ажлыг зохион байгуулах хүрээнд аймаг, нийслэл, дүүргийн Сонгуулийн хорооны дэргэд 136 хүний бүрэлдэхүүнтэй мэдээлэл технологийн 31 баг ажиллаж байгаа бол 1896 хэсгийн хороонд мэдээлэл технологийн 2271 даамал, иргэний бүртгэлийн итгэмжлэгдсэн ажилтан 2500 гаруй хүн тус бүр ажиллаж байгаа юм. Үндсэндээ цагдаа, тагнуул зэрэг байгууллагынхныг оролцуулбал Монгол Улсын Ерөнхийлөгчийн сонгуульд 20 мянга гаруй төрийн албан хаагч дайчлагдан ажиллаж байгаа талаарх мэдээллийг Сонгуулийн ерөнхий хорооны дарга өглөө.