Улсын бүртгэлийн ерөнхий газар, Гадаад харилцааны яам, Сонгуулийн ерөнхий хороо хамтран гадаадад ажиллаж, амьдарч байгаа иргэдийн санал өгөх асуудлаар сэтгүүлчдэд мэдээлэл хийлээ.

Гадаадад байгаа иргэд Ерөнхийлөгчийн сонгуульд анх удаа санал өгч байгаа бөгөөд энэ удаагийн сонгуульд нийт 6233 иргэн санал өгөх юм байна. Ерөнхийлөгчийн сонгуулийн тухай хуульд заасны дагуу маргааш буюу энэ сарын 14-16-ний хооронд саналаа өгөх юм. Санал өгөх боломжтой гадаадад байгаа иргэдийг тавдугаар сарын 5-19-ний хооронд бүртгэсэн бөгөөд үүнд 6478 иргэн 39 салбар комиссоор дамжуулан бүртгүүлсэн байна. Тэдгээрээс 240 иргэн иргэний шинэчилсэн бүртгэлд хамрагдаагүй, регистрийн дугаар, овог нэрийн зэрэг иргэний бүртгэлийн зөрчилтэй байсан учир санал өгөх боломжгүй болоод байгаа юм. Гадаадад ажиллаж амьдарч байгаа иргэдээс хамгийн олноор бүртгүүлсэн нь Сөүл /1454/, Вашингтоны /838/ монголчууд байжээ. Хоёр өдөр үргэлжлэх санал хураалт зургадугаар сарын 16-ний 22.00 цагт дуусгавар болж, битүүмжилсэн саналын хуудсыг СЕХ-нд ирүүлэх юм байна. Харин гадаадад байгаа иргэдийн саналыг энэ сарын 26-ний өдөр болох санал хураалтын дүнтэй нэгтгэн тоолно.