УБЕГ нь Монгол Улсын Ерөнхийлөгчийн сонгуулийн тухай хуулийг хэрэгжүүлэх ажлын хүрээнд сонгогчдын нэрийн жагсаалтыг иргэний бүртгэлийн мэдээллийн улсын сан дахь сонгогчийн бүртгэлд үндэслэн үйлдэх, нягтлан шалгах, давхардлыг арилгах, сонгогчдын нэрийн жагсаалтад бүртгэгдээгүй сонгуулийн эрх бүхий иргэнийг бүртгэх зэрэг ажлыг хуулийн дагуу улсын хэмжээнд зохион байгуулан ажиллаж байна.

Энэ хүрээнд 3 дугаар сарын 1-ний өдрөөс өмнө сонгогчдын нэрийн жагсаалтыг цахим хуудастаа байршуулсан бол энэ сарын 22-ны өдөр мөн хуульд заасны дагуу улсын хэмжээнд хэсэг оноогдсон 1,896,382 иргэний мэдээллийг байршуулж буюу cонгогч аль хэсгийн хороонд санал өгөх, санал өгөх байршлын талаар мэдэх боломжтой веб програмыг шинэчлэн суурилуулах ажлыг бүрэн хийж дуусгасан билээ. Тэгвэл Монгол Улсын Ерөнхийлөгчийн сонгуулийн тухай хуулийн 20.9 дэх хэсэгт Улсын бүртгэлийн байгууллага энэ хуулийн 20.4-т заасны дагуу цахим хуудаст байрлуулсан сонгогчдын нэрийн жагсаалтад дараах өөрчлөлтийг тусган уг жагсаалтыг цаасан болон цахим хэлбэрээр үйлдэж, санал авах өдрөөс 25-аас доошгүй хоногийн өмнө улсын бүртгэллийн байгууллагын аймаг, нийслэл дэх салбар, нэгжээр дамжуулан аймаг, нийслэлийн сонгуулийн хороонд хүргүүлнэ гэж заасны дагуу сонгууль өгөх насны нийт сонгогчдын нэрийн жагсаалтыг 6 дугаар сарын 1-ний дотор хүлээлгэн өгөхөөр бэлтгэл ажлыг хангаж байна.