Монгол Улсын Ерөнхийлөгчийн сонгуулийн тухай хуулийн дагуу гадаадад ажиллаж амьдарч байгаа иргэдийн саналыг тухайн оронд суугаа Дипломат төлөөлөгчийн газраар дамжуулан 2013 оны 6 дугаар сарын 14, 15, 16-ны өдрүүдэд авахаар болсон билээ.

Тэгвэл үүнтэй холбогдуулан Ерөнхийлөгчийн сонгуульд оролцуулах, тэдний саналыг авах ажлыг зохион байгуулах үүрэг бүхий салбар комиссоос Хятад, АНУ, Тайланд, Франц, Герман, БНСУ, Япон зэрэг улсуудад нэгдсэн сургалт семинарыг зохион байгуулж эхлээд байгаа бөгөөд энэхүү баг бүрэлдэхүүнд Улсын бүртгэлийн ерөнхий газрын холбогдох хүмүүс оролцон ажиллаж байна. Гадаадад амьдарч байгаа иргэд Ерөнхийлөгчийн сонгуульд саналаа өгөхийн тулд 5 дугаар сарын 5-29-ний хооронд Дипломат төлөөлөгчийн газартаа биечлэн буюу факс, цахим шуудан, утсаар бүртгүүлж, санал өгөх эрхээ баталгаажуулах юм. Гадаадад ажиллаж амьдарч байгаа, сонгуулийн эрх бүхий иргэдийг Ерөнхийлөгчийн сонгуульд оролцуулах, тэдний саналыг авах ажлыг зохион байгуулах үүрэг бүхий салбар комисс Монгол Улсаас гадаад улсад суугаа нийт 39 Дипломат төлөөлөгчийн газарт байгуулагдсантай холбогдуулан ийнхүү сургалт зохион байгуулж байна.